Яқинда Украинага ATACMS ракеталарини топширишга тайёрлигини эълон қилган Пентагон Украинага ҳарбий ёрдам бўйича 50 дан ортиқ жиноий иш очди. Бу ҳақда Bloomberg хабар берди.
Пентагон бош инспектори Роберт Сторчга кўра, айни пайтда бирорта ҳам айблов тасдиқланмаган.
“Турли босқичларда бўлган текширувларда харидлар давомида фирибгарликка йўл қўйиш, маҳсулотларни алмаштириш, ўғирлик, фирибгарлик ёки коррупция ва бузғунчилик каби масалаларни кўриб чиқилмоқда. Биз бундай даъволарни тасдиқламадик, гарчи келажакда вазият ўзгариши мумкин”, — дейди Сторч.
У Украинага етказиб бериладиган асбоб-ускуналар сони ва тезлигини ҳисобга олган ҳолда, АҚШ кўпроқ текширувлар ўтказишидан огоҳлантирди. Пентагон АҚШ давлат департаменти ва Халқаро тараққиёт агентлиги билан бирга Atlantic Revolvе операцияси доирасида Украинага ажратилган тахминан 113 миллиард долларлик ёрдам ва маблағлар бўйича федерал ҳукумат назоратини бошқармоқда. Худди шундай аудит жараёни Ироқ ва Афғонистондаги урушлар пайтида ҳам бўлган.
Сторчнинг қайд этишича, ҳозирда аудиторлар Киевга ёрдам етказиб беришда бўшлиқларни аниқлаган. Мисол учун, аудит давомида Польша орқали Украинага олиб ўтилган юклар учун тўлиқ бўлмаган декларациялар кузатилган.
“Натижада Мудофаа вазирлиги ходимлари техникаларни етказиб бериш жараёнида барча турдаги ускуналар учун зарур жавобгарликка эга бўлмаган”, — дейилади июнь ҳисоботида.
Ушбу муаммоларга қарамай, Сторчнинг таъкидлашича, Пентагон Украинанинг ҳарбий ёрдам эҳтиёжларига “яхши жавоб берди”.
Пентагон 155 мм артиллерия снарядлари масаласини ҳам ўрганмоқда. Бу орқали АҚШ ҳарбий машғулотлар ва операция эҳтиёжларини мувозанатлашган ҳолда олиб борган ёки йўқлиги аниқланади
Изоҳ (0)