Фарғона вилоятида тўйи куни қочиб кетган йигитга суд ҳукми ўқилиб, у олти йилга қамалди. Бу ҳақда ЎзА хабар берди.
Жиноят ишлари бўйича Қува тумани судида мазкур иш кўриб чиқилган. Иш тафсилотларига кўра, фарғоналик Д.С. реклама сабабли TV канал рақамига қўнғироқ қилиб, техника жиҳозига буюртма беради. Орадан бир неча кун ўтиб унга нотаниш рақамдан қўнғироқ бўлади. Нотаниш йигит ўзини “Hop-Shop” TV каналида ишлашини, унинг буюртмаси бўйича айрим масалаларни аниқлаб олиши кераклигини айтади ва қизнинг ўқишни тамомлаб ишлаётгани, турмушга чиқмагани, оиласи ва бошқа маълумотларни батафсил сўраб олади.
Шундан сўнг К.Ш. Тошкентдан Марғилон шаҳрига келади. Қиз бора-бора йигитнинг барча талабларини ҳеч шубҳаланмай бажарган. Жумладан, К.Ш. унга уйланиши учун уйини таъмирлашга деб пул сўраганда тўплаб юрган барча пулларини берган. Йигит қизда унга бериш учун пули қолмагач, кредит дўконларидан ва тижорат банкларидан пул ҳамда турли товарлар олиб беришни илтимос қилган. Улар никоҳ ўқитгач, йигит қизнинг уйида яшашни бошлаган.
К.Ш. Фарғона шаҳридаги тўйхонада дабдабали тўй қилишини, Тошкентдан казо-казолар меҳмонга келишини айтиб қиз ва унинг яқинларини ишонтирган ва тўй кунини белгилаган. Тўйхона манзили кўрсатилган сохта таклифномаларни Д.С.нинг яқинларига тарқатиб, ҳаммани тўйга таклиф қилган. Шундан сўнг К.Ш. келин ва унинг яқинларини тўплаб уларга қимматбаҳо тўйхонада катта тўй қилиш учун анча қарз бўлиб қолганини, ўзига яна бир оз ёрдам кераклигини айтиб уларни ишонтирган. Барчанинг тўёна пулларини йиғиштириб олиб Тошкент вилоятига қочиб кетган.
Судда ҳам К.Ш. ўзи етказган зарарларни қоплаш ўрнига, жабрланувчи Д.С.ни яна алдашга уринди. Оиласидан ажрашиб унга уйланишини айтиб, фақат зарарларнинг қоплангани ҳақида ариза ёзиб уни қамоқдан қутқариб қолишни илтимос қилган. Суд ҳукми билан фирибгар К.Шуҳратовга 6 йил озодликдан маҳрум қилиш жазоси тайинланди.
Изоҳ (0)