Алексей Навальнийнинг онаси Людмила Навальнаянинг айтишича, масъуллар унга ўғлининг жасадини кўрсатган ва хайрлашмасдан, яширин дафн маросимига рози бўлиш билан таҳдид қилган. Бу ҳақда у 22 февраль, пайшанба куни эълон қилинган видеомурожаатида гапирди. Бу ҳақда Deutsche хабар берди.
Навальная кечаси Тергов қўмитасининг Салехарддаги идорасидан яширинча ўликхонага олиб кетилган ва у ерда ўғлининг жасади кўрсатилган.
“Терговчилар ўлим сабабини билишини айтмоқда. Уларда барча ҳуқуқий ва тиббий ҳужжатлар тайёр, мен кўриб, ўлим ҳақидаги гувоҳномага имзо чекдим. Қонунга кўра, улар дарҳол менга ўғлимнинг жасадини бериши керак эди, лекин ўрнига мени шантаж қилиб, Алексейни қаерда, қачон ва қандай дафн қилиш кераклигини айтиб, шарт қўйди”, — деди Людмила Навальная.
Навальнаяга кўра, хавфсизлик кучлари яширин дафн маросимини ўтказишга розилик олиш учун буйруқ олган.
“Улар дафнни видолашувсиз амалга оширишни хоҳлаяпти. Мен бунга рози бўлмайман, Алексей ким учун қадрли бўлса, улар ҳам ўғлим билан видолашишини хоҳлайман. Менга таҳдид қила бошлагани учун бу мурожаатни ёзиб олдим. Кўзларимга қараб, агар шартларга рози бўлмасам, ўғлимнинг жасади билан нимадир қилишларини айтишди. Терговчи Вeропаев менга очиқчасига фурсатни бой бераётганимни, жасад парчаланаётганини айтди. Ўғлимнинг жасадини зудлик билан қайтариб беришни талаб қиламан”, — деди марҳум сиёсатчининг онаси.
Навальнийнинг вафоти Федерал Жазони ижро этиш хизматининг маҳаллий бошқармаси томонидан 16 февраль куни эълон қилинган эди.
Изоҳ (0)