Ўзбекистонда бир йилда иккитадан ортиқ автомобиль сотганлар давлатга қўшимча солиқ тўлаши мумкин.
Стратегик ислоҳотлар агентлиги тақдимотида бу ҳақда маълум қилинган. Лойиҳага кўра, эндиликда жисмоний шахс ўз номидаги иккитадан ортиқ автомобилни, жумладан, электромобилларни сотмоқчи бўлса, солиқ тизимида декларация тўлдириши керак бўлади. Яъни энди бир шахс иккитадан ортиқ автомобиль соца, қўшимча даромад солиғи тўлашига тўғри келади.
Қайд этилишича, 2022 йилда 33 мингга яқин фуқаро уч ва ундан ортиқ автомобиль харид қилган. Йил давомида иккитадан ортиқ автомобиль сотган жисмоний шахсларни декларациялаш тизими чайқовчиликнинг олдини олишга ва бюджетга қўшимча 30 миллиард сўм тушишига қаратилган.
2024 йил бошидан буён Ўзбекистон автомобиль бозорида ижобий динамика кузатилмоқда. Энг катта ўсиш (7,6 фоизга) фойдаланилган автомобиллар сегментида, энг кам ўсиш (1 фоизга) янги маҳаллий енгил автомобиллар сегментида бўлиб, электромобилларга қизиқиш сезиларли даражада (7,8 фоизга) камайди.
Иккиламчи автомобиль бозори ўртача бирламчи сотувлар ва электромобилларга бўлган қизиқишнинг пасайиши фонидан ишончли ўсишни кўрсатмоқда.
Бир ой давомида барча автотранспорт воситаларининг сотилиши 8 фоизга ошиб, 144,5 минг донани ташкил этди. Шу билан бирга, ўтган йилнинг январь ойига нисбатан 14 фоизга ўсиш қайд этилди.
Бирламчи ва иккиламчи автомобиль бозорларидаги вазият
Йил бошидан буён Ўзбекистонда 128 мингта енгил автомобиль сотилди, бу ўтган ойга нисбатан 6 фоизга кўпдир. Савдоларнинг энг юқори ўсиш суръатлари Навоий, Фарғона ва Бухоро вилоятларида қайд этилди. Шу билан бирга, енгил автомобиллар бозори йиллик ўлчовда 8 фоиздан ошди.
Бирламчи автомобиль бозорида ой давомида сотувлар 1,4 фоизга ошди. Бирламчи автомобиль бозори йил давомида 22 фоизга ўсди.
Шу билан бирга, маҳаллий ишлаб чиқарилган автомобилларнинг бирламчи бозори қарийб 1 фоизга ўсди, бир ой давомида 28 минг дона автомобиль сотилди. Йиллик ўлчовда автомобиль бозорининг ушбу сегменти 20 фоизга ўсди.
Ўзбекистонда иккиламчи автомобиллар бозори ўсишдан тўхтамаяпти
Ой давомида иккиламчи бозорда 96 мингдан ортиқ автомобиль сотилди, бу аввалги ойга нисбатан 7,6 фоизга кўпдир. Шу билан бирга, ўтган йилнинг январь ойига нисбатан ўсиш 4,4 фоизни ташкил этди.
Енгил хорижий автомобиллар сегменти
Январь ойида хорижда ишлаб чиқарилган янги енгил автомобиллар савдоси 5,7 фоизга ўсди ва 3,47 мингта автомобилни ташкил этди. Йил давомида хорижий автомобиль бозорида сотувлар 37 фоиздан ошди.
Электромобиллар бозоридаги вазият
Ўзбекистонда электромобилларга қизиқиш пасая бошлади. Январь ойида енгил электромобиллар савдоси 3,3 мингта автомобилни ташкил этди, бу олдинги ойга нисбатан 7,8 фоизга кам.
Савдоларнинг энг катта пасайиши Самарқанд, Хоразм ва Навоий вилоятларида қайд этилди. Йиллик ҳисобда электромобиллар савдоси 7,7 баробарга ошди.
Изоҳ (0)