Ўзбекистон 2023 йил якунига кўра Хитойдан енгил автомобиллар импортини беш баробардан ортиққа оширди. Бу ҳақда Статистика агентлиги маълумотларида келтирилган.
Импорт қилинган автомобилларнинг умумий сони йил давомида 2,42 баробарга — 30,25 мингдан 73,2 мингтагача ошган. Шу билан бирга, автомобиллар олиб келинган мамлакатлар сони 34 тадан 31 тага камайди.
2023 йилда мамлакатга 58 минг дона Хитой автомобили олиб келинган — бу 2022 йилга нисбатан 5,2 баробарга кўп.
Иккинчи ўринда Жанубий Корея жойлашган бўлиб, мамлакатдан қарийб 11,5 мингта автомобиль импорт қилинган ҳамда йиллик ўсиш 22 фоизни ташкил этган. Учинчи ўринни 2,2 минг кўрсаткич билан АҚШ эгаллади. Кейинги ўринлар қуйидагича:
- Гонконг – 454 та;
- Япония – 419 та;
- Германия – 228 та;
- Ҳиндистон – 65 та;
- БАА – 64 та;
- Буюк Британия – 49 та;
- Бошқа давлатлар – 158 та.
Аввалроқ Ўзбекистонда 2023 йилда ишлаб чиқарилган енгил автомобилларнинг 118 093 донаси Cobalt ҳиссасига тўғри келгани ва бу бошқа русумлар ичида энг кўп миқдор экани хабар қилинганди. Кейинги ўринларда Damas (89 154 дона) ва Gentra (82 133 дона) нисбатан кўп ишлаб чиқарилган. Шу билан бирга, компания ўтган йили 48 082 дона Tracker, 30 596 дона Chevrolet Onix автомобилларини ишлаб чиқарган.
Изоҳ (0)