Тошкентда қарийб 1 992 дона кучли таъсир қилувчи дориларни муомалага киритилишининг олди олинди, деб хабар бермоқда “Дарё”га пойтахт ИИББ матбуот хизмати.
Маълум қилинишича, Чилонзор туманида Spark автомашинаси ҳайдовчиси ва йўловчиси холислар билан кўздан кечирилганда 53 дона “Зардекс” дори воситалари топилиб, ашёвий далил сифатида олинган. Шундан сўнг гумонланувчилар билан ўтказилган суриштирув давомида кучли таъсир қилувчи дорилар кимдан олингани маълум бўлган.
Тезкор тадбир давом эттирилиб, бошқа бир гумонланувчи ҳам қўлга олинган. Унинг ёни ва яшаш манзили холислар билан кўздан кечирилганда катта миқдордаги — 1 939 дона “Зардекс” дориси топилган.
Тадбир давомида 3 нафар гумонланувчидан 1 992 дона, баҳоси 100 млн сўм бўлган дори воситалари ашёвий далил сифатида олинган.
Мазкур ҳолат юзасидан Жиноят кодексининг 2511-модда 3-қисми билан (кучли таъсир қилувчи ёки заҳарли моддаларни қонунга хилоф равишда муомалага киритиш) жиноят иши қўзғатилиб, эҳтиёт чораси сифатида жиноятчилар қамоққа олинган.
Изоҳ (0)