Чеченистон раҳбари Рамзан Қодировнинг 18 яшар ўғли Ахмат Қодиров республика ёшлар билан ишлаш вазири этиб тайинланди. Бу ҳақда Чеченистон парламенти раиси Магомед Даудов ўзининг Telegram каналида маълум қилди.
Тегишли маълумот “Етакчиларнинг техноспорти” спорт фестивалининг очилиш маросимида маълум бўлган. Бундан ташқари, Ахмат тадбирда Чеченистон республикасининг олий мукофоти – Қодиров ордени билан тақдирланган.
У янги тайинловга қадар Чеченистон жисмоний тарбия, спорт ва ёшлар сиёсати вазирининг биринчи ўринбосари лавозимида ишлаган. Рамзан Қодировнинг иккинчи қизи Хадижат Чеченистон раҳбари администрацияси раҳбарининг биринчи ўринбосари ҳисобланади. Чеченистон раҳбарининг тўнғич қизи, республика маданият вазири бўлиб ишлаган Айшат эса Чеченистон ҳукумати раҳбари ўринбосари лавозимига киришган.
Рамзан Қодиров ва унинг оиласи мунтазам равишда тақдирланиб, юқори лавозимларга тайинланиб келади. BBC рус хизматининг 2018 йилда ҳисоб-китобларига кўра, Чеченистондаги 158 нафар юқори мартабали амалдорнинг 30 фоизи республика раҳбарининг қариндошлари, 23 фоизи қишлоқдошлари, яна 12 фоизи Чеченистон раҳбарининг дўстлари ва уларнинг қариндошларидир.
“Қариндошларимнинг ҳар қандай муассаса ва ҳар қандай лавозимдаги талаби ўн баробар кўп, чунки улар менга қарамай ишлашларини исботлаши керак. Кимга ишонсам, ўшани тайинлайман”, — деган эди Қодиров бу борада.
Изоҳ (0)