Наманган вилоятида 2023 йили “Алимент тўловлари жамғармаси” ҳисобидан 76 кишига 1 миллиард 723,1 миллион сўм тўлаб берилди. Бу ҳақда МИБ вилоят бошқармаси бошлиғи Бекзод Мирзааҳмедов маълум қилди, дея хабар беради “Дарё” мухбири Азизбек Абдувалиев.
Фото: Хамдам Мамадалиев
Қайд этилишича, 2022 йилда бу кўрсаткич 219,8 миллион сўмни ташкил этган.
“Янги ташкил этилган жамғарма айрим қарздорлар учун имконият тақдим этмоқда. Қарздор кўрилган чораларга қарамай алимент тўловларини амалга оширолмаганидан сўнг давлат ижрочиси қарорига асосан ушбу сумма жамғарма маблағлари ҳисобидан ундирувчи номига очилган пластик картага ўтказиб берилиши таъминланмоқда”, — дейди Б.Мирзааҳмедов.
Вилоятда вояга етмаганларнинг моддий таъминотидан бўйин товлаётган шахсларга нисбатан тегишли чоралар кўрилмоқда. Жумладан, 2023 йилнинг ўзида 1 077 нафар қарздорга маъмурий жазо, шундан сўнг ҳам хулоса қилмаган 94 нафарига эса жиноят иши қўзғатилган.
“Ихтиёримиздаги ижро ҳужжатлари бўйича 321 кишига нисбатан қидирув эълон қилинган бўлиб, ўтган йилнинг ўзида улардан 207 нафари топилди ва 478 миллион сўм қарздорлик ундириши таъминланди. Айримларини Тошкент шаҳри ва бошқа вилоятлардан ҳам топиб келяпмиз. Жумладан, икки нафар фарзанди учун алимент тўловларидан бўйин товлаб, яшириниб юрган қарздор ота Қашқадарё вилоятидан топилди”, — дейди МИБ Наманган вилоят бошқармаси бошлиғи.
Изоҳ (0)