Тошкент шаҳар ҳокимлиги 18 февраль куни пойтахтда кучли қор ёғиши кутилаётганини эълон қилганди. Иқлимшунос Эркин Абдулаҳатов ҳокимлик хабарида келтирилган маълумотлар бўйича муносабат билдирди.
Хабарда 18 февраль куни кучли қор ёғиши, камида 12 соат давом этиши кутилаётгани, дастлабки маълумотларга кўра, ёғингарчилик ҳажми икки ойлик меъёрдан ошиши маълум қилинганди. Бир оздан сўнг ҳокимлик хабарни таҳрирлаб, қор ёғиши бир неча соат давом этишини кўрсатди.
Эркин Абдулаҳатовнинг билдиришича, пойтахтда сўнгги 30 йилликдаги (1991—2020 йиллар) ойлар кесимидаги ҳарорат ва ёғингарчилик меъёрларига таянилса, Тошкентда январь февралда икки ойлик ёғин 120 мм дан кўпдир (бу ёғин Хоразм вилояти учун бир йиллик ёғиндан ҳам кўп қиймат).
“Бу каби ёғиннинг қор кўринишида пойтахтда айни ярим суткада ёғиб қўйиши, талафотли қор бўрон ва ҳаддан ташқари кўп қор қоплами катаклизми билан тенглаштирилиб, ҳукумат тузилмаларига даҳшатли юкламаларни берган бўлар эди. Фавқулодда ҳолат эълон қилиниши ҳам мумкин бўлар эди”, — дейди иқлимшунос.
Пойтахт ҳокимлиги хабарида қор ёғиши муносабати билан аҳолига турли тавсиялар ҳам келтирилганди. Хусусан, заруратсиз уйдан чиқмаслик, шахсий транспорт воситаларидан фойдаланишни минималлаштиришга ҳаракат қилиш кабилар сўралган.
Эркин Абдулаҳатов Тошкент шаҳар ҳокимлигининг қор ёғишида аҳолига турли кесимлардаги тавсияларини бериш позициясини ҳурмат қилган, олқишлаган ҳолда хабарларни таҳрирлашда эътиборли бўлишларини сўради.
Изоҳ (0)