Жаҳон банки ижроия кенгаши Афғонистон учун 300 миллион доллар ажратишни маъқуллади. Маблағлардан Толибон ҳукумати назоратисиз фойдаланилади, дея тасдиқлади ривожланиш кредитори. Бу ҳақда Аl Arabiya хабар берди.
“3.0 ёндашув” кредити Жаҳон Банки ва Афғонистон ўртасидаги ҳамкорликнинг муҳим қисми бўлиб, у 2021 йилнинг августида Толибон ҳокимиятга келганидан кейин тўхтатиб қўйилган минтақавий инфратузилма лойиҳасини ҳам жонлантиради. 300 миллион долларлик пул миқдори келаси 15 ой ичида Жаҳон банкининг Халқаро тараққиёт ассоциацияси орқали дунёнинг энг қашшоқ мамлакатларига кредит бериш йўли билан ажратилади, деди AFP вакили.
Ушбу маблағлар бутун мамлакат бўйлаб муҳим хизматларни, айниқса аёлларга фойда келтирадиган хизматларни қўллаб-қувватлашда давом этади ва “Толибон” назоратидан ташқарида бўлади, — дейилади хабарда.
Толибон мамлакатдаги аёлларга қўйган айрим чекловлар сабабли кўплаб халқаро ташкилотлар ва ёрдам агентликлари Афғонистонга молиявий ёрдам беришни тўхтатди. Жаҳон банки ҳисоб-китобларига кўра, Афғонистон иқтисодиёти 2021 йилда 20 фоиздан, 2022 йилда эса олти фоиздан кўпроққа қисқарган.
Жаҳон банкининг таъкидлашича, “3.0 ёндашуви” Толибон ҳукумати билан ҳамкорликда принципиал ёндашувни амалга оширишда давом этади, бу эса аёлларни лойиҳалар марказига қўйиб, лойиҳа фаолияти аёллар учун ҳамда аёллар томонидан амалга оширилишини таъминлайди.
Изоҳ (0)