Озиқ-овқат маҳсулотини экспорт қилувчиларга молиявий ресурслар ажратилади

Озиқ-овқат маҳсулотини экспорт қилувчиларга молиявий ресурслар ажратилади. Бу президент томонидан имзоланган “Республикада озиқ-овқат хавфсизлигини таъминлашнинг қўшимча чора-тадбирлари тўғрисида”ги фармон билан белгилаб қўйилган.

Фармонга кўра, халқаро молия институтлари маблағлари ҳисобидан 220 млн доллар миқдоридаги маблағлар 2024 йил 1 мартгача тижорат банкларига йўналтирилади. Бунда тижорат банклари томонидан йиллик Марказий банк асосий ставкасидан 4 фоизлик пункт юқори ставкада (шундан банк маржаси 4 фоиз) миллий валютада қуйидаги имтиёзли кредитлар ажратилади:

• озиқ-овқат йўналишидаги, соҳада маҳсулот етиштиришдан тортиб, уни истеъмолчига етказиб беришгача бўлган қўшилган қиймат занжирини яратишга қаратилган лойиҳаларни молиялаштириш учун — 10 йил муддатга 3 йиллик имтиёзли давр билан;
• айланма маблағлар учун — 18 ой муддатга 6 ойлик имтиёзли давр билан.

2024 йил 1 мартдан Экспортни қўллаб-қувватлаш жамғармаси ресурслари ҳисобидан озиқ-овқат маҳсулотини экспорт қилувчи корхоналарга экспортолди ва экспорт билан боғлиқ савдо операцияларини молиялаштириш учун 2 йил муддатгача улар томонидан охирги 12 ой давомида экспорт ҳажми:

• 100 минг доллардан 1 млн долларгача бўлганда — 100 минг долларгача;
• 1 млн доллардан 2 млн долларгача бўлганда — 1 млн долларгача;
• 2 млн доллардан 4 млн долларгача бўлганда — 2 млн долларгача;
• 4 млн доллардан ортиқ бўлганда — 3 млн долларгача молиявий ресурслар ажратилади. 

Озиқ-овқат маҳсулотларини қайта ишловчи саноат корхоналари ва экспорт қилувчилар томонидан хорижий давлатларда савдо уйи ва дўконларини ташкил этиш учун алоҳида қарорларсиз йилига 50 минг долларгача маблағни хорижий ҳисоб рақамларга ўтказишга рухсат берилади.