Давлат хавфсизлик хизмати АҚШга алдов йўли билан юбормоқчи бўлган яна етти кишини ушлади.
ДХХнинг Тошкент шаҳар бўйича бошқармаси ходимлари томонидан Иқтисодий жиноятларга қарши курашиш департаменти билан ҳамкорликда Чилонзор туманида ўтказилган тезкор тадбирда шундай ҳолатлардан бири аниқланган.
Тошкент шаҳрида яшовчи, 1979, 1999 ва 2001 йилларда туғилган уч нафар шахс ўзаро тил бириктириб, олти нафар фуқарога виза ҳужжатларини олиб бериш ҳамда Европа орқали АҚШда ишлаш учун юбориш эвазига 32 минг доллар олган вақтида ушланган.
Терговга қадар текширув давомида юқоридаги шахслардан бири ушбу мақсадда муқаддам 3900 доллар олгани ҳам аниқланган.
Бухоро шаҳрида кузатилган ҳолатда эса 1997 йилда туғилган, муқаддам уч маротаба судланган шахс алдов йўли 32 ёшли ҳамшаҳарининг ишончига кириб, унга АҚШ элчихонасидан тегишли виза олиб, океан ортига ишга юбориш эвазига 40 минг доллар талаб қилган. Аммо, у сўралган пулдан 30 минг долларни олдиндан олган вақтида ушланган.
ДХХнинг Самарқанд вилояти бўйича бошқармаси ходимлари томонидан ҳам вилоят ИИБ ҳамда ИЖҚКД билан ҳамкорликда тезкор тадбирлар ўтказилган. Жумладан, Самарқанд вилоятида яшовчи, 1989 ва 1995 йилларда туғилган икки нафар шахс ўзаро келишган ҳолда, Самарқанд туманида истиқомат қилувчи фуқарони Ўзбекистон—Туркия—Португалия—Гватемала-Мексика—АҚШ йўналиши орқали Қўшма Штатларга ишга юбориш эвазига 23 минг доллар талаб қилиб, олдиндан 10 минг доллар олган вақтида ушланган.
Бошқа ҳолатда эса Самарқанд шаҳрида яшовчи, 1983 йилда туғилган шахс Самарқанд туманида истиқомат қилувчи фуқарони Ўзбекистон—Туркия—Испания—Гондурас—Мексика—АҚШ йўналиши орқали Қўшма Штатларга ишга юбориш эвазига 18 минг доллар талаб қилиб, олдиндан 10 минг АҚШ доллари олган вақтида ушланди.
Ҳозирда барча ҳолатлар юзасидан мазкур шахсларга нисбатан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.
Изоҳ (0)