Жо Байденнинг сайловолди штаб-квартираси TikTok ижтимоий тармоғида аккаунтни рўйхатдан ўтказди. Эътиборли томони, TikTok’дан фойдаланиш Байденнинг фармони билан кўпчилик АҚШ ҳукумати ходимлари учун тақиқланган.
@bidenhq аккаунти Америка Қўшма Штатларидаги асосий спорт тадбирларидан бири бўлган Super Bowl мусобақаси бўлиб ўтадиган 11 февраль, якшанба куни рўйхатга олинди. Биринчи видео эса АҚШнинг амалдаги президенти Америка футболи ҳақидаги саволларга берган жавобларига бағишланди. Президент финалда “Канзас Сити” ёки “Сан-Франсиско” жамоаларидан қайси бирини қўллаб-қувватлаши ҳақидаги саволга жавоб берар экан, “Филадельфия Иглз” жамоасини афзал кўришини айтди.
“Агар мен ‘Филадельфия Иглз’ тарафдори эмаслигимни айтадиган бўлсам, унда мен ёлғиз ухлашим керак бўлади. Чунки хотиним бу жамоанинг ашаддий мухлиси”, — деди Байден.
Хитойнинг ByteDance компаниясига тегишли TikTok бир неча йиллардан бери Қўшма Штатларда ҳар хил чекловлар ва тақиқларга дучор бўлмоқда.
Америка фуқароларининг TikTok’дан фойдаланишига биринчи марта тақиқ 2020 йилда ўша пайтдаги президент Дональд Трамп томонидан киритилган эди. Аввалига АҚШ армияси ва денгиз флоти ушбу хизматдан расмий қурилмаларда фойдаланишни тақиқлаган.
Трамп маъмурияти федерал тақиқ жорий қилишга уринди, бироқ TikTok томонидан бошланган суд жараёнлари бунга йўл қўймади. Президент Жозеф Байден сайланганидан сўнг, унинг маъмурияти ушбу иловадан давлат хизматчиларининг расмий қурилмаларида фойдаланишни тақиқловчи фармойиш чиқарди, шундан сўнг АҚШнинг 34 штати маҳаллий амалдорлар учун худди шундай тақиқларни қабул қилди. Монтана штати эса иловани барча шахсий қурилмаларга ўрнатишни бутунлай тақиқлаган.
Изоҳ (0)