АҚШ мудофаа вазири Ллойд Остин қовуғи билан боғлиқ муаммолар туфайли касалхонага ётқизилди. Бу ҳақда Пентагон матбуот котиби Патрик Райдер хабар берди.
Пентагон раҳбари Уолтер Рид Миллий ҳарбий тиббий марказга кўрикдан ўтиш учун ётқизилган. Остиннинг ўринбосари, штаб бошлиқларининг бирлашган қўмитаси, Оқ уй ва Конгресс вазиятдан хабардор қилинган. АҚШ мудофаа вазири ваколатларини вақтинча ўзининг ўринбосари Кетлин Ҳиксга топширган.
2023 йил декабрь ойининг бошларида Остинда простата саратони борлиги аниқланганди. 22 декабрь куни умумий наркоз остида ундан ўсимта олиб ташланган, шундан кейин у касалхонадан чиққан. Бироқ, 2024 йил 1 январда у асоратлар туфайли қайта касалхонага ётқизилган, унинг қорин соҳаси, бел ва оёқ қисмида кучли оғриқ кузатилган. Ўшанда Пентагон раҳбарида сийдик йўлларининг инфекцияси аниқланган.
Вазир тўрт кун интенсив терапия бўлимида бўлган. Ўшанда Пентагон президент Жо Байден ва унинг администрациясини бу ҳақда хабардор қилмаган. Оқ уй бундан фақат 4 январь куни хабар топган. 23 январь куни Остин жамоатчиликка кўриниш берган. ОАВ у вазн йўқотгани ва ҳолдан тойган кўринишда бўлганини қайд этган.
Изоҳ (0)