“Вилоятда зилзила оқибатида вафот этган инсонлар учун салкам 983 млрд лира компенсация тўлаб берилган” — Қаҳрамонмараш губернатори

Туркия республикаси президенти ҳузуридаги Коммуникациялар бошқармаси Ўзбекистонда фаолият юритувчи ОАВ вакиллари учун Туркияга пресс-тур уюштирди. Пресс-тур доирасида дастлаб республиканинг Қаҳрамонмараш вилоятига етиб борган журналистлар вилоят губернатори Мукаррам Унлуэр билан учрашиб, зилзиладан энг кўп зарар кўрган вилоятдаги уйларни тиклаш ва аҳолига кўрсатилаётган ёрдамлар борасида ўзларини қизиқтирган саволларга жавоб олди.

Туркия республикасининг Қаҳрамонмараш вилояти губернатори Мукаррам Унлуэрнинг журналистлар саволларига жавоб беришича, вилоятда зилзила сабаб вафот этган марҳумларнинг яқинларига салкам 983 миллиард турк лираси миқдорида компенсация тўлаб берилган. Бу ҳақда губернатор иштирокидаги матбуот анжуманида қатнашган “Дарё” журналисти хабар берди. 

Вилоятимизда AFAD раислигида 251 минг 11 нафар кишига етказилган зарар учун 2 миллиард 510 миллион 110 минг, 92 минг 759 нафар кишини кўчириш учун 1 миллиард 391 миллион 385 минг, вафот этган 18 минг 588 нафар кишининг ўлими учун 982 миллиард 899 миллион 982 минг турк лираси миқдорида компенсация тўлаб берилган, — деди губернатор. 

Масъулнинг қўшимча қилишича, ижара ёрдами сифатида 25 минг 304 та уй эгасига 1 миллиард 328 миллион 438 минг, 28 минг 766 нафар ижарачиларга эса жами 7 миллиард 171 миллион 789 минг 655 лира тўлаб берилган. 

Шаҳримизга 8615 та юк машинасида ёрдам ва хайр-эҳсонлар келтирилди, — дейди губернатор.