Вайрон бўлган шаҳар, жабрланганларга қурилган чодир ва марҳумларга ясалган тобут: Зилзиладан кейинги Қаҳрамонмараш

Қаҳрамонмараш Туркиянинг зилзиладан энг кўп талафот кўрган вилоятларидан бири ҳисобланади. Мазкур вилоят марказидаги кўп қаватли уйлар деярли вайрон бўлган. “Дарё” мухбири Отабек Қўлдошев Туркияга сафари давомида Қаҳрамонмарашда ҳам бўлиб, ҳудуддаги ҳолатни тасвирга олди, жабрланганлар билан суҳбатлашди.

Қаҳрамонмарашда зилзиладан жабрланганлар учун алоҳида яшаш жойи ташкил этилиб, чодир уйлар тикилган. Бу уйларда аҳоли учун барча шарт-шароит яратилган.

“Assalomу алайкум, зилзила сабаб бизнинг уйимиз шикастланди. Катта зарар кўрдик, аммо ҳукуматимиз ёлғиз қолдирмади. Чодир уйлар тикиб берди, ҳар куни уч маҳал хабар олиб, овқатлар билан таъминламоқда. Бунинг учун ҳукуматимизга раҳмат. Бизда ҳозир барчаси етарли, Аллоҳга шукр, давлатимиз кам қилмаяпти. Мен Ўзбекистонни жуда яхши кўраман, ўзбекистонликларга салом йўллайман”, — дейди чодир уйларда яшовчи, зилзиладан жабрланган 10 ёшли бола.

Ҳудуд совуқ бўлгани учун чодир уйлар махсус, ўтин ва кўмир ёқилғисини ёқувчи печлар билан таъминланган.

“Тўсатдан юз берган зилзилани сезишимиз билан ўзимизни бино ташқарисига урдик. Ҳаммаси кўз ўнгимизда ерга чўкди. Эгнимиздаги шу либосимиз билан қолдик. Айни дамда чодирларда яшаяпмиз, буларни ҳис қилиш жуда оғир”, — дейди зилзиладан жабр кўрган суҳбатдошлардан яна бири.

Суҳбатдошнинг тан олишича, зилзила пайтидаги ваҳима уларни ҳамон тарк этмаган. Шундай бўлса-да, жабрланганларнинг вилоятнинг чекка қишлоқларида яшовчи қариндошлари уларнинг ёнига келиб, далда бўлмоқда.

«Бизни йўқлаб Ўзбекистондан келибсиз, Сизга раҳмат. Ҳа, бу офат биз учун кутилмаганда юз берди. Ҳатто ён-атрофда давлат халқини ташлаб қўйди, деган газ-сўзлар тарқалди. Бу хато, чунки мана чодирларимиз бор, овқатимиз етарли. Маҳсулотлар тугаши билан етказишмоқда. Қизил ярим ой, AFAТ ташкилотлари кўмакка келган. Бу давлат соҳибсиз эмас, давлат бу ерда — орамизда. Ҳарбий кучларимиз етарли, полициямиз, аскарларимиз етарли. Ҳар томондан ёрдам келиб турибди. Мен Ўзбекистонни, у ердаги туркий қардошларимизни ҳурмат қиламан. Халқингизга саломимни йўллайман, биз биргамиз», — дейди Эшиқли Тўсин бобо.

Тўсин бобонинг айтишича, у зилзила сабаб 35 нафар қариндошларини йўқотган.

“Бундай офат ҳеч кимсанинг бошига тушмасин, шу зилзила сабаб мен 35 нафарга яқин яқин қариндошларим, қудаларимдан айрилдим. Яратган шуни буюрган экан, сабр қиламиз”, — дейди у.