Qatar Airways Доҳадан Тошкентга мунтазам парвозларни йўлга қўйиши ҳақида хабар берилган эди. Uzbekistan Airports парвозлар қачондан бошланишини маълум қилди.
Унда айтилишича, биринчи парвоз 2024 йил 2 июнга белгиланган. Йўловчи рейслари ҳафтасига тўрт марта — душанба, чоршанба, жума ва якшанба кунлари Airbus А320 самолётларида амалга оширилади.
Биз учун бу даражадаги йирик авиакомпаниянинг Тошкент аэропортига парвоз қилиши жуда муҳим. Биз ҳар йили нафақат рейслар географиясини кенгайтириш, балки хорижий авиаташувчилар сонини кўпайтириш, бозорда соғлом рақобатни ривожлантириш ва шу билан бирга, йўловчиларга хизмат кўрсатиш сифатини яхшилаш устида иш олиб борамиз, — дейилади Uzbekistan Airports хабарида.
Qatar Airways бош қароргоҳи Доҳада жойлашган Қатар миллий авиакомпанияси ҳисобланади. Авиакомпания дунё бўйлаб 170 дан ортиқ йўналишларга парвоз қилади. Ушбу авиакомпания кўплаб нуфузли мукофотларни қўлга киритган ва Skytrax томонидан етти марта дунёнинг энг яхши авиакомпанияси деб топилган.
2021 йилнинг июнида Ўзбекистон ва Қатар ҳукуматлари ўртасида “Ҳаво қатнови тўғрисида”ги битим имзоланганди. Унда Доҳа—Тошкент—Доҳа йўналишида тўғридан тўғри авиақатновларни йўлга қўйиш кўзда тутилган. Ўша йилнинг сентябрида авиакомпания Ўзбекистонга мунтазам авиақатновларини амалга ошириш учун рухсатнома олди.
2023 йилнинг июнида Қатарнинг Ўзбекистондаги элчиси Ҳасан Ҳамза Асад Муҳаммад Ҳошим Транспорт вазири Илҳом Маҳкамов билан учрашувда Qatar Airways Доҳа—Тошкент—Доҳа йўналишида авиақатновларни амалга ошириш бўйича компания ички тартибларини ишлаб чиқаётганини маълум қилганди.
Изоҳ (0)