Франциялик эркак 8 йил сарфлаб Эйфель минорасининг 7 метрли макетини ясади. Аммо гугуртнинг нотўғри тури туфайли рекорд ўрнатилмади

Гиннес рекорди мутахассислари Эйфель минорасининг 7,19 метрли макетини гугурт чўпдан ясалган дунёдаги энг баланд иншоот сифатида рўйхатдан ўтказишдан бош тортди. Бу ҳақда “Правила жизни” хабар берди.

2023 йил 27 декабрда 47 ёшли Ришар Пло Эйфель макети қурилишини якунлади. Унга 706,9 минг дона гугурт ва 4,2 минг соат (175 тўлиқ кун) керак бўлди. Лойиҳага у ҳаммаси бўлиб 8 йил вақт сарфлаган. Бироқ, Гиннес рекорди китоби мутахассислари қарийб саккиз йил давом этган бу лойиҳани китобга киритмади.

Улар қарорини фақат дўконларда сотиладиган оддий гугуртдан фойдаланиш лозимлиги билан изоҳлади. Гугурт учидаги ёнувчан моддани кесиб ташлаш мумкин, аммо гугуртни жиддий деформациялаш ва унга шакл бериш қоидага зид эди.

Ришар, дастлаб, ўз минорасини дўконда сотиладиган оддий гугуртдан қурган. Аммо, ҳар сафар учларини кесиб ташлашдан чарчагани боис, ишлаб чиқарувчи корхонага ёнувчан моддаларсиз тайёрланган гугуртларга буюртма берган. Бу эса Гиннес рекордлари китоби мутахассислари томонидан турли эътирозлар бўлишига олиб келган.

Гиннес рекордлар китоби вакили Марк Маккинли вазиятга муносабат билдирди. Қайд этилишича, комиссия макетни баҳолашда бир оз қаттиққўллик қилган. У тез орада Ришар Пло билан боғланишга ва Гиннес қоидаларини қайта кўриб чиқишга тайёр эканлигини билдирди.