UzAutoMotors 2023 йилда ўзбекистонликларга нечта автомобиль сотганини маълум қилди

Ўзбекистон 2023 йилда Chevrolet автомобиллари сотуви бўйича дунёда иккинчи ўринни эгаллади. Бу ҳақда UzAutoMotors хабар берди.

Компанияга кўра, бу натижага эришишга мамлакатда сўнгги бир неча йилдаги автомобиль маркаларига бўлган юқори талаб сабаб бўлган.

Chevrolet сотуви бўйича жаҳон рейтингида АҚШ 1,7 миллионта автомобиль сотиб, биринчиликни эгаллаган. Ўзбекистон 370 мингта Chevrolet бренди остидаги автомобиллар сотиб, иккинчиликни олган.

Шу билан бирга, мазкур маркадаги машиналар сотувида Бразилия (327 минг 781 та), Мексика (172 минг 66 та) ва Хитой (168 минг 830) бешталикка кирган.

Аввалроқ Ўзбекистонда 2023 йилда ишлаб чиқарилган енгил автомобилларнинг 118 093 донаси Cobalt ҳиссасига тўғри келгани ва бу бошқа русумлар ичида энг кўп миқдор экани хабар қилинганди. Кейинги ўринларда Damas (89 154 дона) ва Gentra (82 133 дона) нисбатан кўп ишлаб чиқарилган. Шу билан бирга, компания ўтган йили 48 082 дона Tracker, 30 596 дона Chevrolet Onix автомобилларини ишлаб чиқарган.

Айни пайтда Cobalt ва Damas сотувда мавжуд эмас. Gentra ишлаб чиқариш эса тўхтатилиши хабар қилинган.

Эслатиб ўтамиз, UzAutoMotors 2023 йил 25—27 декабрь кунлари Cobalt, Damas ва Labo автомобиллари учун жами 171 200 дан ортиқ шартномалар тузди. Мазкур автомобиллар 2024 йилда ишлаб чиқарилиши ва мижозларга етказилиши режалаштирилган.