“Иш берувчига миллий байрамларимизни нишонлаш бўйича ҳам мажбурият юкланади” — Ташқи меҳнат миграцияси агентлиги

Бугунги кунда меҳнат миграцияси географияси кенгайтирилмоқда. Бу ҳақда Ташқи меҳнат миграцияси агентлиги бошлиғи ўринбосари Ҳожиакбар Файзуллахўжаев “Дарё” нашрига берган интервьюсида айтиб ўтди.

Унинг сўзларига кўра, бугунги кунда Европанинг иқтисодиёти ривожланган мамлакатлари, Англия, Германия, Латвия, Литва, Руминия, Польша мамлакатлари бўш иш ўринлари таклиф қиляпти. Шу билан бирга, Осиёдан Саудия Арабистони, Қатар, Япония каби давлатлардан ҳам таклифлар бўлмоқда. 

“Яқинда Канаданинг Ўзбекистондаги элчиси билан ҳам раҳбариятимиз музокара ўтказди. Канадага ҳам қурилиш соҳасида фуқароларимизни жалб қилиш таклифи бўляпти”,  – дейди мутахассис. 

Агентлик раҳбари ўринбосарининг таъкидлашича, бугунги кунда ўзбекистонлик фуқаролар асосан қурилиш, хизмат кўрсатиш, тиббиёт, қишлоқ хўжалиги йўналишларида иш таклиф қилинмоқда. Шунингдек, Европада юк ташиш, яъни логистика йўналишларида ҳам кўплаб вакансиялар келиб тушяпти. 

Ҳожиакбар Файзуллахўжаев таклиф қилинаётган маошлар хусусида ҳам гапириб ўтди.

“Германияда 2000–2500 евро, Кореяда 2000 доллар, Японияда 1500 доллардан бошланяпти. Ойликлари фуқароларимизни қизиқтиряпти, улар шу танловларда рўйхатдан ўтишмоқда”, – дейди у. 

Ташқи меҳнат миграцияси агентлиги бошлиғи ўринбосарининг айтишича, иш берувчи билан шартнома тузилаётганда ходимнинг маънавий, руҳий ҳолатига таъсир ўтказмайдиган жиҳатлар ҳам кўрсатилади. 

“Ҳаттоки, миллий байрамларимиз нишонланадиган саналар ҳам кўрсатилади. Бу борада иш берувчиларга мажбурият ҳам қўямиз, ўша кунлари маълум диаспорани чақириб байрам қилиш бўйича. Бу борада Ўзбекистоннинг ўша мамлакатдаги ваколатхона ва элчихона вакиллари қатнашади”, – дея қўшимча қилади Ҳожиакбар Файзуллахўжаев.