Кобулда 29 январь куни минтақанинг 11 давлати вакиллари ва элчиларининг учрашуви бўлиб ўтди. “Толибон” ҳукумати бу учрашувга мезбонлик қилди.
Учрашувда нималар муҳокама қилингани ҳақида батафсил маълумотлар эълон қилинмаган. Бироқ бу учрашувга ўз вакилларини юборган кўплаб давлатлар минтақа хавфсизлиги ва барқарорлигидан хавотирда. Афғонистондаги кейинги икки йилдаги ўзгаришлар улар учун унчалик ҳам қониқарли бўлмаган.
Учрашувда қуйидаги давлатлар иштирок этган:
- Россия — махсус вакил Замир Кабулов (элчи Дмитрий Жирнов ҳам)
- Эрон – махсус вакил ва муваққат ишлар вакили Ҳасан Каземи Қуми
- Хитой –махсус вакил Юе Сяоюн ва элчи Чжао Син
- Покистон – муваққат ишлар вакили Убайд ар-Раҳмон Низамани
- Туркия – муваққат ишлар вакили Женк Унал
- Туркманистон – элчи Хожа Овезов
- Ўзбекистон – элчи Ёдгорхўжа Шодмонов
- Қозоғистон – элчи Алимхан Есенгелдиев
- Қирғизистон – муваққат ишлар вакили Данияр Жолчуев.
Шунингдек, Ҳиндистон ва Индонезидан ҳам расмий вакил қатнашмоқда.
“Афғон минтақавий ҳамкорлик ташаббуси” сарлавҳаси остида ўтказилган ушбу йиғилишда “Толибон” ҳукумати ташқи ишлар вазири вазифасини бажарувчи Амир Хон Мутаққий барча давлатлар билан ижобий ҳамкорликни таъкидлаб, ҳеч ким билан қарама-қаршилик ва тўқнашув истамаслигини айтди. Аксинча, улар барча халқаро томонлар билан мавжуд хавотирларни муҳокама қилишга тайёр.
“Толибон” ҳукумати ташқи ишлар вазири вазифасини бажарувчи минтақадаги хавфсизлик ва барқарорликка урғу бериб, минтақадаги хавфсизлик уларнинг ҳукумати учун алоҳида аҳамиятга эга эканини қўшимча қилди.
“Ярим асрга яқин зўравонликларни бошидан кечирган мамлакат сифатида Афғонистон минтақадаги ҳеч бир давлатнинг хавфсизлик ва беқарорликка дуч келишини истамайди, Афғонистон Ислом Амирлиги учун минтақа хавфсизлиги алоҳида аҳамиятга эга ва “Толибон” ҳукумати минтақа давлатлари билан умумий манфаатлар ва ўзаро ҳурмат асосида ҳамкорлик қилишга тайёр”, — деди Мутаққий.
Аммо Афғонистоннинг қўшнилари, жумладан Эрон ва Покистон ва минтақа давлатлари Афғонистондаги мавжуд вазият ва бу давлатда террорчилик гуруҳлари ташкил этилишидан ўз хавотирларини бир неча бор билдирган.
Мутаққий йиғилишида “Толибон” ҳукумати моделига ҳурмат кўрсатишга чақирди, чунки унинг сўзларига кўра, Афғонистон тарихи хорижий моделлар бу давлат учун ишламаслигини кўрсатган.
“Толибон” ушбу тадбирни ўтказишдан мақсад минтақавий ҳамкорликни ривожлантириш, умумий манфаатлар, ўзаро ҳурмат асосида минтақавий ҳамкорлик йўлларини муҳокама қилиш, шунингдек, алоқа ва транзит имкониятларини муҳокама қилиш эканини таъкидлади.
Изоҳ (0)