“Толибон” Ўзбекистон билан қуруқликда юк ташиш ва транзит соҳасида ҳамкорликни кенгайтиришга келишиб олганини маълум қилди

Афғонистон ва Ўзбекистон қуруқликдаги юк ташиш ва транзит йўналишларини очиш соҳасида ҳамкорликни кенгайтиришга келишиб олди. Бу ҳақда Sputnik Afghanistan хабар берди.

Мазкур келишувга “Толибон” Транспорт вазирлиги раҳбарининг Ўзбекистонга ташрифи ортидан эришилди, деди вазирлик матбуот котиби Имомуддин Аҳмадий. Унинг қўшимча қилишича, келишувга мувофиқ ҳар икки давлат транспорт воситалари ҳеч қандай тўсиқсиз ҳаракатланиши мумкин.

Аҳмадий, шунингдек, ташриф давомида икки давлат ўртасидаги ҳаво қатнови ва афғон ходимлари салоҳиятини ошириш соҳасидаги ҳамкорлик ҳам муҳокама қилинганини айтди. Унинг сўзларига кўра, афғонистонлик ходимлар Ўзбекистон томонидан ўқитилиши режалаштирилган.

“Толибон” Саноат ва савдо вазирлиги матбуот котиби Абдул Салам Жавад Охундзода ҳам Ўзбекистонни Афғонистоннинг муҳим иқтисодий ҳамкорларидан бири сифатида тилга олиб, Ўзбекистон Афғонистон билан электр энергетика, технология ва озиқ-овқат соҳаларида яхши савдо алоқаларига эга эканини таъкидлади.

Сўнгги ойларда “Толибон” ҳукумати ва Ўзбекистон ўртасидаги алоқалар кенгайди, икки давлат вакиллари Кобул ва Тошкентга ташриф буюриб, турли соҳаларда ҳамкорлик меморандумларини имзолади.