Франция ички ишлар вазири Жералд Дарманин 2024 йилда Парижда бўлиб ўтадиган Олимпиада ўйинларида жамоат тартибини ҳимоя қиладиган полиция ходимларига қўшимча маош ваъда қилди, деб ёзмоқда Le Figaro газетаси.
Олимпиадада тартибни сақлаш учун қўшимча тўлов, киши бошига 1 900 еврони (тахминан 25,6 миллион сўм) ташкил қилади.
Нашрнинг ёзишича, Дарманен полициядаги норозиликни тинчлантириш учун шундай қарорга келган. Франция ҳуқуқ-тартибот идоралари ходимлари оммавий иш ташлашлар ва фермерларнинг кенг кўламли норозиликлари туфайли хавфли шароитларда ва юкламада ишлашга мажбур бўлаётганидан норози. Олимпиада ўйинлари туфайли ёзги таътилсиз қолиш эҳтимоли уларни хурсанд қилмаяпти.
Аввалроқ Франция ҳукуматининг собиқ раҳбари Элизабет Борн полициячиларга Олимпиада ўйинларида ишлагани учун бонуслар ваъда қилганди, бироқ ўшанда гап анча кам – 500 дан 1500 еврогача бўлган бонуслар ҳақида кетган.
Олимпиада бошланишига олти ойдан кам вақт қолди, шу сабабдан Франция Ички ишлар вазирлиги раҳбари Парижда қонун ва тартибни таъминлашда улкан масъулият юклайдиган полициячилар ўртасидаги норозиликни ҳар томонлама бартараф этишга уринмоқда.
Франция ҳукумати Олимпиада вақтида жамоат тартибини ҳимоя қилиш бўйича мисли кўрилмаган чоралар кўриши маълум бўлганди. Франция пойтахтида полициядан ташқари 15 минг аскар ва хусусий қўриқчи, шунингдек, дронлар, ҳарбий қирувчи самолётлар ва вертолётлар хавфсизликни таъминлайди.
Изоҳ (0)