Тошкентда Nokia’нинг ҳуқуқини бузганлар салкам 24 млн сўм жаримага тортилди

Nokia Corporation компаниясининг интеллектуал мулк ҳуқуқи ҳимоя қилинди, деб хабар бермоқда Адлия вазирлиги ахборот хизмати. 

Маълум қилинишича, Адлия вазирлигига 2023 йил давомида Nokia Corporation Финляндия компаниясининг ишончли вакили томонидан мазкур компанияга тегишли бўлган Nokia (MGU 5043, 5044, MBX 1715263, 1435983, 1715260, 1416724-сон гувономалар) товар белгисидан айрим шахслар ноқонуний фойдаланаётгани тўғрисида мурожаат келиб тушган.

Ушбу мурожаат асосида Адлия вазирлиги томонидан тегишли тартибда ўрганишлар ўтказилди. Ўрганиш натижасида бир қатор жисмоний шахслар Nokia товар белгиси билан айнан бир хил бўлган контрафакт маҳсулот сотаётганликлари аниқланди. 

Ушбу ҳолат юзасидан жисмоний шахсларга нисбатан маъмурий ҳуқуқбузарлик тўғрисида баённомалар расмийлаштирилиб, тегишли тартибда кўриб чиқиш учун судларга юборилган. Жиноят ишлари бўйича Шайхонтоҳур ҳамда Чилонзор туман судлари томонидан ҳуқуқбузарлар (О.У., Р.Ж., О.Н., М.А., А.Ш., М.О., А.С., V.О.)га Маъмурий жавобгарлик тўғрисидаги кодекснинг 177-моддаси биринчи қисмида келтирилган ҳуқуқбузарлик ҳолатларини содир этгани учун жами 23 760 000 сўм жарима жазоси тайинланди.