Жаҳонгир Аҳмадалиев ва Ҳамдам Собиров муаллифлик ҳуқуқини бузгани аниқланди. Энди улар 60 млн сўм товон пули тўлайди

Муаллиф асарларидан рухсатсиз фойдаланган, муаллифлик ҳуқуқларини бузган бир қатор шахслар жавобгарликка тортилди. Бу ҳақда Интеллектуал мулк агентлиги хабар қилди.

Қайд этилишича, Ўзбекистон халқ ёзувчиси Ўткир Ҳошимовнинг меросхўри Ф.Ҳошимов муаллифнинг асарларига бўлган мулкий ҳуқуқларини ҳимоя қилиш мақсадида адлия органларига мурожаат қилган.

Натижада адлия органлари томонидан Ў.Ҳошимов асарларидан меросхўрнинг рухсатисиз ҳамда тегишли тартибда шартнома тузмасдан фойдаланган «З.К.» номли нашриётнинг мансабдор шахсига нисбатан Мамурий жавобгарлик тўғрисидаги кодекснинг 177-1-моддаси (муаллифлик ҳуқуқини ва турдош ҳуқуқларни бузиш) билан маъмурий ҳуқуқбузарлик тўғрисидаги баённома расмийлаштирилган ва тегишли суд томонидан жарима жазоси тайинланган.

Бундан ташқари, қонунчиликда муаллиф асаридан рухсатсиз фойдаланиш натижасида етказилган зарар қопланиши ўрнига базавий ҳисоблаш миқдорининг йигирма бараваридан минг бараваригача товон тўланиши белгиланган.

Шунга мувофиқ, даъвогар Ф.Ҳошимов Тошкент шаҳар Шайхонтоҳур туманлараро судига муаллифлик ҳуқуқлари бузилгани учун товон пули ва маънавий зарар ундириш ҳақидаги даъво аризасини киритган. Натижада суд даъвогар Ф.Ҳошимов фойдасига «З.К.» номли нашриётнинг мансабдор шахсига нисбатан 12 миллион 500 минг сўм миқдорда товон пули тўлаш лозимлиги ҳақида қарор қабул қилган.

Юқоридаги ҳолатга ўхшаш муаллифлик ҳуқуқларининг бузилиши оқибатида суд томонидан даъвогар ҳисобига товон пули тўлаш лозимлиги ҳақида бир неча қарорлар чиқарилган. Хусусан, фарғоналик шоирнинг муаллифлик ҳуқуқларини бузган хонанда Миродил Ҳакимов томонидан ҳам 50 миллион сўм миқдорида маънавий зарар ҳамда базавий ҳисоблаш миқдорининг 300 баробар миқдорида (90 миллион сўм) товон пули ундириш белгиланган.

Худди шу каби ҳолат муаллифларнинг ҳуқуқларини ҳимоя қилувчи жамоат бирлашмаси мурожаатига асосан хонандалар Жаҳонгир Аҳмадалиев ва Ҳамдам Собировларнинг қўшиқлари уларнинг рухсатисиз, ҳеч қандай шартнома тузмаган ҳолда фойдаланилгани туфайли суд томонидан ҳуқуқбузарга нисбатан 60 миллион сўм миқдорида товон пули ундириш ҳақида қарор чиқарилган.