Қашқадарё вилояти Косон тумани ҳокими Асрол Бойқораев маҳаллий кенгаш қарори билан 1 та боғдорчилик, 1 та чорвачилик ҳамда 46 та пахта ва ғаллачиликка ихтисослашган фермер хўжалик ерларини туман захирасига қайтарганига оид хабарлар турли муҳокамаларга сабаб бўлди. Туман ҳокимлиги ҳолат юзасидан тушунтириш берди.
Вилоят ҳокимлигининг хабар беришича, Халқ депутатлари Косон туман кенгашининг 2024 йил 11 январь кунидаги “Косон тумани қишлоқ хўжалиги бўлими бошлиғи Ж.Эргашевнинг таклифи асосида ижара шартномасини бекор қилиш ва фермер хўжалиги ерини захирага қайтаришни ташкил этиш тўғрисида”ги қарорига кўра, тумандаги 48 нафар фермер хўжалиги билан тузилган ер ижара шартномалари бекор қилингани ва ер майдонлари захирага қайтарилгани бўйича ижтимоий тармоқларда хабарлар тарқалди.
Шу муносабат билан Қашқадарё вилояти Адлия бошқармасининг тақдимномаси ва шунга асосан вилоят ҳокимининг топшириғи билан Халқ депутатлари Косон туман кенгашининг 2024 йил 11 январдаги қарорини бекор қилиш бўйича Халқ депутатлари Қашқадарё вилоят кенгашига қарор лойиҳаси киритилган.
Шунингдек, туман ҳокимлиги қуйидагича изоҳ берган. Халқ депутатлари Косон туман кенгашининг 2024 йил 11 январь кунидаги “Косон тумани қишлоқ хўжалиги бўлими бошлиғи Ж.Эргашевнинг таклифи асосида ижара шартномасини бекор қилиш ва фермер хўжалиги ерини захирага қайтаришни ташкил этиш тўғрисида”ги қарор эса техник хато туфайли чиқарилган. Аслида қарорда кўрсатилган хўжаликлар ердан мақсадсиз фойдалангани аниқланган ва бу бўйича ҳужжатлар судга тақдим этилиши белгиланганди.
Мазкур ҳолат юзасидан хатога йўл қўйган масъулларга тегишли чоралар кўрилиши таъкидланган
Изоҳ (0)