Туркманистон халқаро денгиз ташкилотининг (IMO) денгиз ҳаракатини енгиллаштириш тўғрисидаги конвенциясига қўшилиши учун тегишли чораларни кўрмоқда, деб хабар берди Altin Asyr маҳаллий телеканали.
Бу масала ҳукумат йиғилишида муҳокама қилиниб, унда Транспорт ва коммуникациялар агентлиги бош директори Мамметхон Чакиев маъруза қилди.
Унинг сўзларига кўра, бу халқаро ҳамкорликни ривожлантириш, халқаро стандартларга мувофиқ денгиз навигацияси ва ҳаракатланиш тартиб-қоидаларини соддалаштириш, халқаро савдони яхшилаш имконини беради.
“Мамлакатда Каспий денгизининг Туркманистон сектори транспорт инфратузилмасини модернизация қилиш, денгиз флотини кенгайтириш, Туркманбоши халқаро денгиз портида юк ташиш ҳажмини ошириш бўйича тадбирлар амалга оширилмоқда”, — деди Чакиев.
Мутахассисларнинг “Дарё”га маълум қилишича, Туркманистон Каспий денгизига чиқиш имкониятига эга бўлиб, минтақа халқаро транспорт ва транзит йўлаклари имкониятларини максимал даражада оширишга интилмоқда.
Ашхобод ва Тошкент Туркманбоши портидан Хитой – Қирғизистон – Ўзбекистон – Туркманистон – Озарбайжон – Грузия – Туркия – Европа трансмиллий йўналишининг бир қисми сифатида фойдаланиш мумкинлигига ишониб, транзит ҳамкорлик учун қулай шарт-шароитлар яратиш вариантларини муҳокама қилмоқда.
Ушбу порт 2018 йилда ишлай бошлаган. 1,5 миллиард долларлик лойиҳа Gap Inşaat (Туркия) томонидан амалга оширилган.
Портнинг умумий қуввати нефть маҳсулотларини ҳисобга олмаганда йилига 17 миллион тонна турли юкларни ташкил этади. 150 гектардан ортиқ майдонда тўртта терминал мавжуд: умумий юклар, контейнерлар, қуйма юклар ва автопаромлар.
Янги инфратузилма Ипак йўли бўйлаб Осиё ва Тинч океанидан, сўнгра Россия, Озарбайжон ва Эрон портлари орқали Европага товарлар жўнатиш имкониятини яратди.
Эзиз Бояров
Изоҳ (0)