Қирғизистон президенти Садир Жапаров 2024 йилда экинларни суғориш суви танқислигини бартараф этиш учун янги суткалик (БСР) ва ўн кунлик (BDР) сув ҳавзалари барпо этилишини маълум қилди, бу эса қўшни давлатларни ҳам сув билан таъминлайди, деб хабар бермоқда “Кабар”.
Қирғизистонда БСР ва BDР услубида сув йиғиш қўшни давлатларга суғориш мавсумида ёрдам берадими, деган саволга жавоб берар экан, Садир Жапаров унинг топшириғига кўра, бутун мамлакат бўйлаб янги суткалик ва ўн кунлик сув ҳавзалари барпо этилишини таъкидлади. Шунингдек, мавжуд ҳавзалар тозаланади, бу биринчи навбатда қуйироқда жойлашган қўшни мамлакатларга фойда келтиради, чунки суғориш мавсумида оқар сув билан боғлиқ келишмовчиликлар юзага келмоқда.
“БСР ва BDР биринчи навбатда қуйи оқимда яшовчи қўшниларимиз учун фойдали, чунки суғориш мавсумида сув билан боғлиқ келишмовчиликлар юзага келади. Агар қишда БСР ва BDРда муздан эриган сувни йиғсак, баҳордан дарё суви тўлиқ қўшниларимизга оқади. Улар аввалгидан ҳам кўпроқ сув олади. Суғориш мавсумида деҳқонларимиз БСР ва BDР сувларидан, қўшниларимиз эса оқар сувдан фойдаланишлари мумкин бўлади”, — деб тушунтирди Жапаров.
Унинг эслатишича, кунлик тартибга солиш ҳавзалари йўқлиги сабабли сув Бишкекка оқиб келяпти, бу эса кўчаларни сув босишига сабаб бўлмоқда.
“Агар БСР бўлганда, бу сувларни сақлаб қолиш мумкин эди. Мамлакатимизнинг барча ҳудудларида шундай бўлмоқда. Агар қишда сув захира қилсак, қўшниларимизга ҳам етарли бўларди. Кейинчалик низолар келиб чиқмаслиги учун қишда оқиб кетадиган сувлардан самарали фойдаланишга интиляпмиз. Қўшниларимизга қанча керак бўлса, шунча сув берамиз”, — деди Қирғизистон президенти.
Жапаров ушбу муаммоларни ҳал этиш устида иш олиб бораётганини қўшимча қилди.
“Биз нафақат ўзимизни, балки қўшниларимизни ҳам ўйлаймиз, чунки умумий муаммоларни биргаликда ўйлашимиз керак, биз ариқнинг бошида турибмиз, сув бермаймиз, деб баҳслашиш бемаънилик. Ҳаммамиз қардош халқмиз, азалий қўшнимиз ва кўп жиҳатдан бир-биримизга боғлиқмиз. Ҳаммасини санаб ўтирмайман, буни одамларнинг ўзи жуда яхши билади”, — деб хулоса қилди у.
Изоҳ (0)