Швейцария Бош прокуратураси Давосдаги Жаҳон иқтисодий форумида қатнашган Исроил президенти Исаак Герцогга нисбатан Ғазо секторидаги вазият юзасидан қўйилган айбловларни кўриб чиқмоқда. Бу ҳақда прокуратуранинг расмий вакили Матео Кремаши “РИА Новости”га хабар берди.
“Швейцария Бош прокуратураси жиноий айбловлар олинганини тасдиқлади. Айбловлар ҳозирда оддий процедурага мувофиқ текширилмоқда”, — дейди Кремаши.
У шу тариқа Швеция Исроил президентига нисбатан тергов ҳаракатлари олиб бормоқдами деган саволга жавоб берди. Бироқ Кремаши аризачиларнинг шахсини ошкор қилишдан бош тортди. Унга кўра, ҳозирда прокуратура Швейцария ТИВ билан Герцогнинг дахлсизлиги масаласида маслаҳатлашмоқда.
Ўтган ҳафта Гаага халқаро суди Жанубий Африка Республикасининг Ғазо секторида геноцид конвенциясини бузганликда айбланган Исроилга қарши даъвоси бўйича тингловларни бошлади. ЖАР Тель-Авивни анклавдаги ҳарбий амалиётини тўхтатишга, унинг аҳолиси озиқ-овқат, сув ва инсонпарварлик ёрдамига эга бўлишини таъминлашга ва у ерда халқаро миссиялар бўлишига халақит бермасликка чақирди. Исроил халқаро суднинг юрисдикциясини қабул қилмаса ҳам, бу жараёнларда иштирок этмоқда.
Бир қанча давлатлар, жумладан Туркия, Малайзия, Венесуэла, Бразилия ва Эрон ЖАРнинг талабини қўллаб-қувватлади. АҚШ давлат департаменти, ўз навбатида, Ғазо секторида геноцид аломатларини кўрмаётганини таъкидлади, Еврокомиссия бу масалага изоҳ бермади.
Изоҳ (0)