Шимолий Атлантика альянси Россиянинг эҳтимолий ҳужумига тайёр. Бу ҳақда 18 январь, пайшанба куни Брюсселда бўлиб ўтган қўшма матбуот анжуманида НАТО Ҳарбий қўмитаси раиси Роб Бауэр ва Европадаги иттифоқчи кучлар олий қўмондони Кристофер Каволи маълум қилди.
“Биз мудофаа иттифоқимиз, шунинг учун тайёр бўлишимиз керак. Яъни, маълум соҳаларда малакага эга бўлган кўпроқ ходимлар билан яхшиланмоқдамиз, тайёргарлик даражамизни оширмоқдамиз”, — деди Бауэр.
НАТО қўмондонлиги вакиллари альянс стратегияси ва режаларида икки таҳдид – Россия ва террорчи гуруҳлар тасвирланганини эслатди.
“Биз ишлаб чиққан ва Вильнюсда маъқулланган режаларимиз Россиядан келаётган таҳдидга қарши туришга қаратилган”, — деди НАТО Ҳарбий қўмитаси раҳбари.
Ўз навбатида, Каволи ҳам “Ҳа, биз тайёрмиз” деди. Шу билан бирга, у февраль ойида сўнгги ўн йилликдаги энг йирик тўрт ойлик машғулотлар бошланишини эълон қилди, унда 90 мингга яқин одам қатнашади. Манёврлар Норвегиядан Руминиягача бўлган Европа ҳудудини қамраб олади.
Бауэр сўзларига кўра, машғулотларнинг бундай кўлами альянс янги тайёргарлик кўрганини билдиради.
17 —18 январь кунлари Брюсселда НАТОнинг юқори мартабали ҳарбий раҳбарлари учрашуви бўлиб ўтди.
Изоҳ (0)