Осиё Кубоги. 1-тур баҳсларидан сўнг қайд этилган натижалар ва турнир жадвалларидаги ҳолат 

Қатар яшил майдонлари мезбонлик қилаётган навбатдаги Осиё Кубоги мусобақаси бошланганига ҳам 5 кун бўлди.

16 январь кунги F гуруҳидаги баҳслар билан 1-тур ўйинлари ўз якунига етди. Унда Саудия Арабистони Уммонни сўнгги дақиқаларда пенальтидан урилган гол эвазига мағлуб этган бўлса, Таиланд Қирғизистон устидан ишончли ғалабани қўлга киритди.

1-тур баҳсларидан кейин гуруҳлар қандай кўриниш олгани ва қандай натижалар қайд этилгани хусусида қисқача баён қиламиз.

А гуруҳи

Мусобақанинг очилиш ўйинида Қатар Ливанга қарши баҳс олиб борди. Учрашув мезбонларнинг устунлигида ўтди. Биринчи бўлим сўнггига бориб, ҳисоб очилди. Қанотдан кўтариб берилган тўпни Алига келиб тушди ва у тўпни Афифга тўхтатиб берди, Акром эса кучли зарба билан дарвозани ишғол қилди. 

Иккинчи бўлимда ҳам қатарликлар 2 бор дарвозани аниқ мўлжалга олди. Бу сафар 56-дақиқада Алмоз Али ўз ҳисобига гол ёздирган бўлса, ўйин сўнггида Афиф дублни расмийлаштирди.

Гуруҳнинг иккинчи ўйинида Хитой Тожикистонга қарши майдонга тушди. Учрашувда ҳисоб очилмади ва жамоалар 1 очкодан жамғаришга муваффақ бўлди.

2-турда Қатар Тожикистонга қарши, Ливан эса Хитойга қарши баҳс олиб боради. Иккала учрашув ҳам бугун, 17 январь куни бўлиб ўтади.

B гуруҳи

Ўзбекистон терма жамоаси ўрин олган гуруҳ. Сречко Катанес Сурияга қарши баҳсда Остон Ўруновдан марказий ҳужумчи ясамоқчи бўлди. Бироқ, бу ўйлов кутилган натижани бермади. Ўйин нурсиз дуранг билан якунланди. Бу яхши бўлмаса ҳам, жуда ёмон натижа ҳам бўлмади. 

Ўйиндан хулоса қилиб, Катанес Ҳиндистонга қарши баҳсда таркибга ранг-баранглик киритишини кутиб қоламиз.

Гуруҳнинг иккинчи ўйинида Австралия Ҳиндистонни 2:0 ҳисобида мағлуб этди. Учрашувдаги голлар Жексон Ирвин ва Жордан Бослар ҳисобига ёзилди.

2-тур баҳслари 18 январь куни бўлиб ўтади. Австралиянинг Сурияга қарши ўйини 16:30 да старт олса, Ўзбекистон ва Ҳиндистон ўртасидаги учрашув 19:30 га белгиланган.

C гуруҳи

Эрон Фаластинни йирик, 4:1 ҳисобида мағлуб этди. Ўйиндаги дастлабки гол 2-дақиқадаёқ урилди. Карим Ansaрифард ўз ҳисобига гол ёздириб қўйди. 12-дақиқада Шожа Ҳалилзода дарвозани ишғол қилди. 38-дақиқада Меҳди Гаеди ҳисобни йирик кўринишга олиб келди. Биринчи бўлим охирида Тамер Сеям жавоб голини уришга муваффақ бўлди. 

Иккинчи бўлимда эса эронликлар яна бир бор дарвозани аниқ мўлжалга олди. Бу сафар гол Сардор Азмун ҳисобига ёзилди. Шу тариқа Эрон мусобақани йирик ғалаба билан бошлади.

Гуруҳдаги иккинчи ўйинда эса БАА ва Гонг Конг ўртасида кечди ва унда 3:1 ҳисобида БАА ғалаба қозонди. Учрашувдаги голларга Султон Одил, Заед Султон, Яҳё Алҳассани (БАА) ва Чан Сиу Кван (Гонг Конг) муаллифлик қилди.

2-турда БАА Фаластин билан баҳс олиб боради. Эрон эса Гонг Конгни синовдан ўтказади. Биринчи ўйин 18 январь куни 22:30 да старт олса, иккинчи ўйин 19 январь куни худди шу соатларга белгиланган.

D гуруҳи

Япония қанақадир ярим соат ичида барчанинг кучли ҳайратига сабаб бўлди. 11-дақиқада Минаминонинг голи эвазига ҳисобни очган японлар Вьетнамдан кетма-кет 2 та гол ўтказиб юборди. 16-дақиқада бурчакдан оширилган тўпни Нгуен боши билан дарвозага жойлаб қўйди. 33-дақиқада эса ажойиб ҳужумни Ҳаи Пҳам гол билан якунлади. 

Шундан сўнг японлар голли вазиятларни кетма-кет ярата бошлади ва биринчи бўлим охиригача ҳисобни тенглаштириш билан бирга, олдинга ҳам ўтиб олди. 45-дақиқада Минамино яна бир бор дарвозани ишғол қилди. Ҳакам қўшиб берган 4-дақиқада Накамура Япониянинг учинчи голига муаллифлик қилди. Иккинчи бўлимда Аяси Уэда ҳам ўз номини таблога ёздириб қўйди. Якуний ҳисоб 4:2, японлар фойдасига.

Гуруҳдаги иккинчи ўйин Ироқ ва Индонезия ўртасида кечди. Ушбу учрашувда ироқликлар 3:1 ҳисобида ғалаба қозонди.

2-турда Япония Ироққа қарши ўйнайди (19 январь, 16:30), Индонезия эса Вьетнам билан куч синашади (19 январь, 19:30).

E гуруҳи

Нафақат ушбу гуруҳ, балки, турнир фаворитларидан бири бўлган Жанубий Корея Баҳрайнга қарши баҳс олиб борди. Ўйиндаги дастлабки гол 38-дақиқада Ҳван Ин-Беом томонидан киритилди. 51-дақиқада Абдуллоҳ ал-Ҳашаш ҳисобни тенглаштиришга муваффақ бўлди. 56 ва 68-дақиқада Ли Канг Ин дарвозани ишғол қилиб, кореяликларнинг ишончли ғалабасига ҳисса қўшди.

Гуруҳдаги навбатдаги ўйин Иордания ва Малайзия ўртасида бўлиб ўтди. Иордания 4:0 ҳисобида рақибини тор-мор этди.

2-турда гуруҳдаги иккала ғолиб жамоалар Жанубий Корея ва Иордания бир-бирига тўқнаш келади. Учрашув 20 январь куни 16:30 да старт олади. Баҳрайн ва Малайзия ўртасидаги ўйин эса ўша куни 19:30 га белгиланган.

F гуруҳи

Саудия Арабистони ва Уммон ўртасидаги баҳс анча қизиқарли кечди. Дастлаб, 14-дақиқада Салоҳ ал-Яҳёйи пенальтидан унумли фойдаланиб, ҳисобни очди. 78-дақиқага келиб, саудияликлар мувозанатни тиклашга муваффақ бўлди. Абдулраҳмон Ғариб жарима майдони ичигача кириб бориб, бир неча ҳимоячи қуршовида бўлса ҳам дарвозага зарба йўллади ва ҳисобни тенглаштирди. 96-дақиқада Саудия яна бир бол гол урди. Али Албулайҳи бурчакдан оширилган тўпни боши билан дарвозага жойлаштирди. Бироқ, ҳакам бу голни ўйиндан ташқари ҳолат дея баҳолаб, ҳисобга олмади. Аммо, кейинчалик қарор ўзгартирилиб, ўйиндан ташқари ҳолат бўлмагани аниқланди. Шу тариқа Саудия Арабистони иродали ғалабани қўлга киритди.

Иккинчи ўйинда Таиланд Қирғизистонни 2:0 ҳисобида таслим этди. Супачаи Чаидед учрашувда дублни расмийлаштирди.

2-турда Саудия Арабистони Қирғизистон билан (21 январь, 22:30), Таиланд эса Уммон билан (21 январь, 19:30) баҳс олиб боради.