Oxirgi uch yil davomida Toshkent shahri aholisi boshqa hududlardagiga qaraganda eng ko‘p ipoteka kreditlari olmoqda. Bu haqda Markaziy bank eʼlon qilgan infografikada maʼlumot berilgan.
Hisob–kitoblarga ko‘ra, 2023-yilda O‘zbekistonda 68 ming 395 nafar fuqaroga 16 trillion 851 milliard so‘m ipoteka kreditlari ajratilgan. Shundan eng ko‘p miqdor Toshkent shahri hissasiga to‘g‘ri keladi — 5 trillion so‘m. Poytaxt aholisiga 2022-yilda ham boshqa hududlardagiga nisbatan eng ko‘p — 4,3 trillion so‘m, 2021-yilda esa 2,6 trillion so‘m ipoteka kreditlari berilgan.
O‘tgan yilda Farg‘ona (1,3 trillion so‘m), Navoiy, Toshkent va Samarqand viloyatlari aholisiga (har biriga 1,2 trillion so‘mdan) nisbatan yuqori miqdordagi ipoteka kreditlari ajratilgan. Eng kam kredit olganlar Sirdaryo viloyati (380 milliard so‘m) aholisi bo‘lgan.
2023-yildagi ipoteka kreditlarining 10,7 trillion so‘mini (63 foizi) erkaklar, 6 trillion so‘mini (37 foizi) ayollar olgan.
Kreditlarning 69 foizi 31–50 yoshgacha, 20 foizi 18–30 yoshgacha, 11 foizi 50 yoshdan yuqori fuqarolar hissasiga to‘g‘ri kelgan.
Markaziy bank hisobotida so‘nggi 6 yilda aholiga jami 62,9 trillion so‘m ipoteka kreditlari ajratilgani keltirilgan. Xususan, aholiga:
- 2018-yilda 4,8 trillion so‘m;
- 2019-yilda 7,9 trillion so‘m;
- 2020-yilda 9,1 trillion so‘m;
- 2021-yilda 9,8 trillion so‘m;
- 2022-yilda 14,4 trillion so‘m ipoteka kreditlari berilgan.
Avvalroq Markaziy bank 2023-yilning o‘tgan davrida kredit foizlari qanday o‘zgargani bo‘yicha infografika eʼlon qilgandi.
Izoh (0)