“Иван Васильевич касбини ўзгартиради” фильмида келишган ўғри Жорж Милославский, “Олтин бузоқча”да Шура Балаганов каби бетакрор ролларни қойилмақом тарзда ижро этган Леонид Куравлёв ҳаёти ҳақида маълумот берамиз.
Қийин ўтган болалик
Бўлажак актёр уруш бошланишидан 5 йил олдин Москвада туғилган. Унинг отаси самолёт заводида механик, онаси эса сартарош эди. 1941 йилда онаси туҳматга қолиб, аксилинқилобий фаолият учун 58-моддага биноан ҳибсга олинади. Аёл шимолга жўнатилади, кейинчалик ўғлини ҳам Мурманск вилоятига юборишади — она-бола казармада яшайди. Фақат 10 йилдан кейингина Валентина Куравлёва Москвага қайтиб келади.
Бўлажак актёр мактабда унчалик яхши ўқимайди, ВГИКда ўқиш хоҳиши ҳам унда кутилмаганда пайдо бўлган. Унга холаваччаси шу университетни танлашни маслаҳат берган, чунки кириш имтиҳонларида математика талаб қилинмаган. Куравлёвнинг омади биринчи мартадаёқ кулмайди: икки йилдан сўнг у ниҳоят талаба бўлади. Биринчи йили ўқишга киролмаганида, у ўйинчоқ ишлаб чиқарадиган заводга ишга киради, лекин у ерда узоқ вақт ишлолмаслигини аниқ биларди.
Кино оламига йўл
ВГИКда ўқиётгандаёқ Куравлёв дебют қилади. Унинг экрандаги биринчи чиқиши Александр Гордон ва Андрей Тарковскийнинг “Бугун ишдан бўшатишлар бўлмайди” фильмидаги роли эди. Ўқишни тугатгандан сўнг, Леонид Вячеславович кинода фаол роль ўйнайди ва унинг қаҳрамонлари ҳеч кимни бефарқ қолдирмайди. Кўп қиррали актёр том маънода ҳар қандай ролни қойилмақом тарзда ижро эта оларди: у комедия ва драмаларда ҳам бирдек маҳоратли эди.
1964 йилда Василий Шукшиннинг “Шундай йигит бор” фильмидаги Павел Колоколников ролидан сўнг, Куравлёв ниҳоят юлдузга айланади — унинг ўзи бу персонажини севимли қаҳрамонларидан бири деб атайди.
“Вий” фильмининг суратга олиш майдончасида Куравлёв катта фожианинг олдини олади: Наталья Варлей уч метр баландликда жойлашган тобутдан йиқилади. Актёр ўзини йўқотмай, уни ушлаб қолади.
Ҳаммаси бўлиб халқ артисти 200 дан ортиқ образ яратган, унинг экрандаги сўнгги чиқиши 2015 йилда Александр Андраникяннинг “Ҳаммаси мураббо” комедиясидаги бош роль эди.
Бир умрлик севги
16 ёшида Куравлёв ўзининг ягона севгисини учратади: у конкида учиш майдончасида 13 ёшли Нина билан танишади. Саккиз йил ўтгач, улар турмуш қуради ва 2012 йилда Нинанинг вафотигача бирга яшашади. Леонид Вячеславович ҳеч қачон хотинидан айрилганига ишонмайди. Актёр том маънода ҳаётга бўлган иштиёқини йўқотади — у Нинани соғинганини яширмайди.
Куравлёвнинг хотини унга доимо сўзсиз ишонган ва у ҳеч қачон уни алдамаган. Нина мактабда инглиз тили ўқитувчиси бўлиб ишлаган ва кейинчалик директор вазифасини бажарган.
Актёр ҳар доим рафиқасининг ундан ақллироқ экани, ҳамманинг эътибори унда бўлишини айтишдан уялмайди. Унинг ёнида шундай ажойиб аёл борлигидан фахрланади. Эр-хотиннинг икки фарзанди —1962 йилда қизи Екатерина ва 1978 йилда ўғли Василий дунёга келади.
Қизи Шукинский мактабини тамомлаган ва “Энг жозибали ва латофатли” фильмида роль ўйнаган. Аммо кейинчалик касбини ўзгартиришга қарор қилади ва психолог бўлади. Екатерина турмушга чиқмаган, фарзандлари ҳам йўқ. Актёрнинг ўғли яқин дўсти Василий Шукшин шарафига номланган. У иқтисод йўналишида таълим олиб, бизнес билан шуғулланади. Ҳозирда унинг уч ўғли бор ва у оиласи билан бахтли ҳаёт кечирмоқда.
Изоҳ (0)