Бой тадбиркор Арнав Сингҳ Райзада роли Барун Собтини ҳинд сериалларининг юлдузига айлантирди. Унинг қаҳрамони ва актриса Саная Эрони ижросидаги Куши Кумари Гуптанинг севги ҳикояси бутун дунё бўйлаб томошабинлар меҳрини қозонди. Аммо Собтининг айтишича, у ҳеч қачон актёрлик карьерасини орзу қилмаган.
Бўлажак актёрнинг ота-онаси санъатдан узоқ одамлар эди. Отаси Раж Собти кичик бизнес билан шуғулланган, онаси Вину уй ишлари ва болалар тарбияси билан банд бўлган. Барундан ташқари оилада Рича исмли синглиси ҳам бор. Баруннинг ўзи ҳеч қачон актёрлик ҳақида ўйламаган. У 1984 йил 21 августда Деҳлида туғилган ва мактабда ўқиб юрган чоғларидаёқ футболга қизиқиб, профессионал футболчи бўлишни орзу қилган. Бироқ вақт ўтиши билан у Ҳиндистонда футболчиларнинг келажаги йўқлигини тушунади, шунинг учун у спортни тарк этади.
Коллеждан сўнг Собти 7 йил давомида фуқароларга мобил алоқа хизматларини кўрсатувчи Jindal Telecom компаниясида менежер бўлиб ишлайди. Агар кутилмаган воқеа рўй бермаганида, шу ерда ишлашни давом эттириши мумкин эди. Унинг энг яқин дўсти Каран Ваҳи актёр бўлиб, телевидениеда суратга тушиб юрарди. У Барунни ҳеч бўлмаганда бир марта кастингга келишини сўрайди, лекин Собти боришга уялади.
Шундан сўнг Каран ташаббусни ўз қўлига олади. Экта Капурнинг “Шраддҳа” фильми учун кастингга борган Ваҳи ўзи билан Баруннинг фотосуратларини ҳам олиб боради. Режиссёрга суратлар ёқади ва бош ролга Собтини тасдиқлайди. Каран эса унинг укаси ролини ўйнайди. Афсуски, бу лойиҳа муваффақиятли бўлмайди.
Кейинчалик Барун “Қалблар учрашуви” телесериалида эпизодик роль ўйнайди. Айтиш мумкинки, айнан шу роль унга томошабинлар эътирофини олиб келади.
Аммо Барун Собти “Муҳаббат тафти” телесериали чиққандан кейин чинакам машҳур бўлиб уйғонади. Бу бутун дунёда жаранглаган ҳақиқий ғалаба эди. Мазкур фильм Туркияда намойиш этилган биринчи ҳинд сериали бўлиб, у ерда машҳурликка эришади. Ўзбекистонда ҳам бир неча бор эфирга узатилади. Шунингдек, у АҚШ, Буюк Британия, Грузия, Болгария, Руминия, Миср, Қозоғистон ва бошқа мамлакатларда намойиш этилади.
Бундай шиддатли ютуқдан сўнг Барун ижодий таржимаи ҳолининг кейинги босқичи кино бўлиши керак, деб қарор қилади. У ҳеч иккиланмасдан сериални тарк этади ва Болливуднинг учта фильмида роль ўйнайди: “Мен ва жаноб Ҳақиқат”, “Сен менинг якшанбамсан” ва “22 ярд”.
Афсуски, бу лойиҳалар муваффақият қозона олмайди. Бир мунча вақт Барун оммавий ахборот воситаларининг эътиборидан четда қолади. Унинг экранга қайтишга уринишлари кутилган муваффақият келтирмайди. Айтишларича, у шу туфайли депрессияга тушиб, спиртли ичимликларга муккасидан кетади. Мухлислар севимли актёрининг кўринишидан даҳшатга тушади.
Бир вақтлар келишган ва ниҳоятда фотогеник йигит бўлган, кўп марта Осиёнинг энг келишган эркакларидан бири сифатида тан олинган Барун пиёнистага ўхшаб қолганди.
Бу ҳолат бир неча йил давом этади, у ниҳоят ўзини қўлга олади. 2020 йилда мухлисларини хурсанд қилиш учун Барун “Асур: қоронғи томонингни англа” номли криминал триллерда ўйнайди. Веб-сериал Ҳиндистонда муваффақият қозонади ва актёр бир нечта мукофотга сазовор бўлади. Кейинги детектив мини-сериал Собти муваффақиятини янада мустаҳкамлайди.
У ўз ўрнини жиноят жанридаги веб-сериалларда топади, ҳозир ҳам бу йўналишда фаол ривожланишда давом этмоқда. Бу йил Барун биринчи марта панжоб тилидаги “Зулматда” деб номланган веб-сериалда роль ўйнади ва бунинг учун у “Энг яхши иккинчи пландаги актёр” номинациясида Filmfare мукофотига сазовор бўлди. Айтганча, панжоби Баруннинг она тили, шунинг учун у ўз ролида ҳеч қандай қийинчиликларга дуч келмади.
Ҳозирда Ҳиндистонда ўз хизматини жадал ривожлантираётган Американинг Netflix кўнгилочар компанияси Собтини ўз қаноти остига олди ва тез орада у яна иккита янги веб-сериалда иштирок этади.
Актёрнинг шахсий ҳаётига келсак, у рафиқаси Пашмин Манчанда билан 9-синфда ўқиб юрганида танишган. 2010 йил 12 декабрда улар тор доирада камтарона тўй ўтказади. Рафиқасининг кинога ҳеч қандай алоқаси йўқ ва у халқаро компанияда ишлайди.
2019 йил июнь ойида эр-хотиннинг қизи — Сифат дунёга келди. 2023 йил апрель ойида эса узоқ кутилган ўғил фарзанд туғилди, унга Мир деб исм қўйишди. Бугун Барун Собти ҳар қачонгидан ҳам бахтли ва 39 ёшида шон-шуҳрат сари янги йўл бошлаганини ҳис қилмоқда.
Изоҳ (0)