Режиссёр Люк Бессоннинг “Васаби” фильми экран юзини кўрганига ҳам 20 йилдан ошди. Фильм бош қаҳрамони Жан Ренонинг қизи ролини япониялик актриса Рёко Ҳиросуэ ижро этган эди. Кўплаб томошабинлар унинг ижросини юқори баҳолаган, лекин кейинчалик у катта лойиҳаларда кўриниш бермаган.
2019 йилда Жан Рено Рёко билан учрашиб суратга олиниши режалаштирилаётган “Васаби-2” фильмида иштирок этишини муҳокама қилган. Актрисанинг кейинги тақдири, шахсий ҳаёти ва карьераси қандай кечди?
Болалик йиллари
Рёко июль ойида 43 ёшни қарши олди. Унда болаликдан санъатга иштиёқ кучли бўлган. Қўшиқ айтишни, рақсга тушишни ва мактаб театрида чиқишни яхши кўрган. Шунингдек, Ҳиросуэ нафақат роллар ижро этган, балки ўзини режиссёр сифатида ҳам синаб кўрган. Мактабдаги устозлари унинг ўқишни хоҳламаганига кўз юмган, чунки у барча ижодий танловларда мактаб номидан қатнашиб, совринли ўринларни эгаллаган.
Ижоддан ташқари у спорт билан ҳам шуғулланишни яхши кўрган. Актриса бугунги кунга келиб ҳам соғлом турмуш тарзига амал қилади ва мунтазам спорт билан шуғулланади.
Муваффақият йўли
У 14 ёшга тўлган пайтида “P&G” компанияси моделлар танловини ташкил қилади. Рёконинг танловда иштирокини кўрган мутахассислар уни бир йилдан сўнг “Heart ni S” лойиҳасида суратга тушиш учун таклиф қилган. Кейинчалик “Узоқ давом этган таътил” сериалида қатнашди. Картина катта муваффақият қозонди ва унда иштирок этган барча актёрлар машҳурликка эришди.
20 ёшида актриса “Ёздаги қор” телесериалидаги иштироки учун ‘‘Энг яхши ёрдамчи роль’’ мукофотига сазовор бўлди. Шундан кейин уни “Васаби” фильмига таклиф қилишди ва актриса бутун дунёга танилди. Рёко отаси билан биринчи марта учрашган қувноқ ўсмир қиз ролини ижро этиши керак эди. Ота ролини эса Жан Рено ўйнаган.
Бутун дунё бўйлаб машҳурликдан сўнг, актрисанинг карьерасида бир оз пасайиш бўлгандек кўринди. Томошабинлар Рёко актрисалик фаолиятини тугатди деган фикрга ҳам келган. Аслида Рёко Ҳиросуэ фаолиятини давом эттираётган, шунчаки “Васаби” даражасидаги фильмларда суратга тушмаётган эди. Юми каби қаҳрамонни такрорлашнинг иложи бўлмади, лекин Рёко мунтазам фильмларда иштирок этган ва бугун ҳам қатнашиб келмоқда.
“Васаби”дан кейин актриса “Ҳаётимиз коллажи” мелодрамасида, “Ҳана ва Алиса” комедиясида, “Сокин рақс” сериалида суратга тушди.
2008 йилда Ҳиросуэ “Ортда қолган” фильмида иштирок этди ва кўплаб танқидчилар томонидан истеъдоди эътироф этилди. Фильм энг яхши хорижий лойиҳа деб топилди ва халқаро кинофестивалда мукофотга сазовор бўлди. Шунингдек, “Оскар” мукофоти билан ҳам тақдирланди.
Шахсий ҳаёти
Актрисанинг биринчи турмушидан ўғли бор, у ҳозир 19 ёшда. Афсуски муносабатлар муваффақиятли бўлмади. Тўйдан 4 йил ўтиб, эр-хотин ажрашган.
Актриса 2 йилдан кейин рассом Кендле Жун билан оила қуради ва тез орада иккинчи марта она бўлади. Рёко нафақат касбида, балки аёл учун муҳим бўлган севикли ёр ва меҳрибон она сифатида ҳам ўзини топди. У ўзини бахтли аёл деб ҳисоблайди.
Актрисанинг бугунги ҳаёти
Жозибали ва истеъдодли Рёко фильмларда роль ўйнашда давом этмоқда. У Японияда хонанда сифатида ҳам таниқли. Ижодкор бўш вақтини оиласи билан ўтказишга ҳаракат қилади. Оилавий байрамлар уюштиришни яхши кўради ва болалари билан караоке куйлайди.
Агар “Васаби-2” фильмининг суратга олиш ишлари ростдан ҳам амалга ошса, ишининг усталари — Люк Бессон ва Жан Рено бошчилик қиладиган картина муваффақият қозонишига шубҳа йўқ.
Изоҳ (0)