Одатда бирон бир юмушни қилиш учун имкониятлар етарли эмаслигидан нолиймиз. Лекин орамизда соғлом инсонга қараганда имконияти чекланган, аммо муваффақият қозонган инсонларга дуч келамиз. Бундай кишилар актёрлар сафида ҳам йўқ эмас. Қуйида жиддий касаллик билан курашиб ҳам мақтанишга арзийдиган фаолият юритган актёрларнинг баъзилари ҳақида ҳикоя қиламиз.
Питер Динклейж
Питер Динклейжнинг бўйи туғма ахондроплазия туфайли 135 сантиметрни ташкил этади. Оилада бу касаллик фақат Питерда кузатилган. У ўз фаолиятини 26 ёшида бошлаган. 2011 йилга келиб, “Элф”, “Нарния йилномалари: Шаҳзода Каспиан” ва бошқа кўплаб фильмларда суратга тушишга улгурган таниқли актёр эди.
Лекин унга ҳақиқий шон-шуҳратни “Тахтлар ўйини” сериалидаги роли келтирди. Питер ролга кастингсиз таклиф қилинган кам сонли актёрлардан бири бўлди. Жорж Мартин Тирион Ланнистер персонажини Питер маромига етказиб ўйнай олишига ишонган.
Шунингдек, у “Сирана”, “Қасоскорлар: Абадият уруши”, “Ғаройиб одамлар”, “Эббинг, Миссури чегарасидаги учта реклама тахтаси” каби машҳур фильмларда ҳам суратда тушган.
АрЖей Митт
Туғилиш пайтида у болаларда учрайдиган мия фалажи касаллигини орттириб олди. Лекин касаллик унинг 2007 йилда актёр бўлишига, 2008 йилда катта муваффақиятга эришган “Эгрилик сари” телесериалида кичик Уолтер Уайт ролини ўйнашига тўсқинлик қилмади.
Миттнинг сўзларига кўра, у ўзининг ногиронлигини бошқалардан фарқли жиҳати сифатида қабул қилган ва ундан максимал даражада фойдаланишга ҳаракат қилади. “Эгрилик сари” картинасидан сўнг фаолиятини фаол давом эттирди ва “Триумф”, “Бугунги апокалипсис”, “Қайтиш” ва бошқа кўплаб фильмларда суратга тушди.
Гейтен Матараззо
Гейтен Матараззонинг ижросидаги “Жуда ғалати ишлар” фильми қаҳрамони Дастин исмли йигит ташқи кўриниши сабаб қизларни ўзига ром эта олмайди. Гап шундаки, Гейтеннинг ўзи кам учрайдиган курак суяги дисплазияси касаллигидан азият чекади. Бу эса ўз навбатида бошқа нохуш муаммоларга ҳам олиб келади. “Жуда ғалати ишлар” фильмидаги иштироки Матараззога ёрдам берган. У нафақат ўзига бўлган ишончни оширган, балки муҳим операцияларга сарфлаши керак бўлган катта миқдордаги пулни ҳам ишлаб олган.
Милли Шапиро
Курак суяги дисплазияси кам учрайдиган касаллик бўлса-да, кино олами вакилларидан нафақат Матараззо, балки “Ирсият” фильми орқали мухлисларга таниш бўлган Милли Шапиро ҳам шу касалликдан азият чекади.
Милли фаолияти давомида учта телесериалда иштирок этган, шунингдек, театрда ишлайди ва треклар ёзади. Ҳатто 2013 йилда “Грэмми” мукофотига номзод ҳам бўлган.
Майкл Жей Фокс
Майкл унга паркинсон касаллиги ташхиси қўйилишидан олдин ҳам таниқли эди. У 1991 йилда ушбу касаллик туфайли эртами-кечми актёрлик фаолиятини тарк этиши кераклигини англади, гарчи аломатлар аввалроқ бошланган бўлса ҳам. Кўпчилик мухлисларнинг фикрича, агар Майкл “Келажакка қайтиб 2” фильмини суратга олиш чоғида муваффақиятсиз трюк сабаб ҳушини йўқотмаганида, эҳтимол бу касалликка чалинмаган бўларди.
Жей Фокс вазиятнинг жиддийлигини ташхисдан сўнг англаган, лекин фильмларда суратга тушишда давом этаверган. Фақатгина 2020 йилга келиб, фаолиятини якунлади. Шу билан бирга, сўнгги йиллар у учун жуда оғир кечмоқда, чунки у ўз нутқини назорат қилишни йўқотди ва хотираси ҳам сусайган.
Изоҳ (0)