Ёш актёр 21 ёшида катта шон-шуҳратга эришади. Кейинчалик тақдирнинг кўплаб қийинчиликларини бошдан кечиришга мажбур бўлган. Ҳамма ҳам ҳаёт синовларидан мардонавор курашиб ўта олмайди. Айниқса ёш, кўркам ва муваффақиятли бўлса, омад умрбод қолишига ишонади.
Борис Бистров мактабни тамомлаб, Чехов номидаги Москва бадиий театр олий мактабига ўқишга киради. У ерда талабаларга фильмларда суратга тушиш мутлақо тақиқланган эди. Бу Борис учун жуда ҳам қайғули эди, чунки уни иккинчи курсда ўқиб юрган пайтларида “Замонамиз қаҳрамони” фильмида Печорин ролини ўйнашга таклиф қилишган эди.
Кинога бўлган катта қизиқиш уни “Мосфильм” студиясига етаклаб борди. У ерда фильмда кампир ролини ўйнаган устози Софья Пилявскава билан учрашади. Театр ўқув юртидаги тақиқ сабаб таклифни рад этишга мажбур бўлади. Бир йилда кейин яна худди шундай сценарий такрорланади.
Эраст Гарин уни “Оддий мўъжиза” фильмида айиқ ролини ўйнашга таклиф қилади. Малика ролини Анастасия Вертинская ижро этиши керак эди. Синов пайтида тасвирга олиш гуруҳига Борис ва Анастасия жуфтлиги жуда ҳам маъқул келади, лекин Гарин ҳарчанд ҳаракат қилмасин театр мактаби ректорини Борисни фильмда роль ўйнаши учун кўндира олмайди.
Якунда Вертинская бошқа бир “Уруш ва тинчлик” фильмида суратга тушиш учун ролдан воз кечади. Айиқ роли бўлса, Олег Видовга насиб қилди. Аммо тақдир Борис учун янада яхшироқ совғаларни тайёрлаб қўйган эди.
У 21 ёшида олий мактабни тамомлаб, “Ленком” театрида иш бошлайди. Айнан ўша ерда уни режиссёр Борис Рицарев “Аловуддиннинг сеҳрли чироғи” фильмига бош ролни ижро этиш учун таклиф қилади. Тасвирга олиш жараёни Қрим ўлкасида бўлиб ўтди. Фильм ижодкорлари қадимги Херсонес шаҳрининг баланд қирғоғида гўзал Бағдодни барпо этади.
Гўзал малика ролини 15 ёшли Додо Чоговадзе ижро этади. Қиз Борисни яхши кўрган, лекин у жуда ҳам ёш бўлган.
Суратга олиш гуруҳи жуда аҳил бўлган. Донолар-доноси ролини Георгий Милляр ўйнаган ва ўзининг ҳаётий қизиқ воқеалари, ҳазил-мутойибалари билан ҳаммага яхши кайфият улашган. Фильм ҳақиқатда ажойиб чиқди ва ‘‘Боғдодда ҳамма ёқ тинч’’ ибораси билан эсда қолди.
Премьерадан кейин ёш йигитчага кўплаб мақтовлар бўлди. Ҳамма бурчакда унинг суратлари туширилган журналлар, откриткалар сотила бошланган. Мухлисларнинг унга бўлган муносабати бир зумда бошини айлантириб қўйди. Ҳаёт фақат байрамларга айланди — зиёфатлар, спиртли ичимликлар, ўткинчи романтикалар.
Аммо тез орада ҳаммаси ўзгарди. Режиссёрлар уни ролга чақиришга иккиланиб қолди. Сабаби бундай келишган ҳарбийлар, оддий ишчилар ва ҳақиқий комсомолчилар бўлиши мумкин эмасдик кўринган. Борис театрда ишлашга эътибор қаратди ва шундан кейин фақат вақти-вақти билан кинода ўйнади.
“Зарба! Яна зарба!”, “Эски масжиддаги учрашув”, “Сариқ чамадоннинг саргузаштлари” фильмларидаги роллари актёрнинг энг кўзга кўринган фильмлари сифатида эсда қолди. Лекин ҳеч бири олдинги муваффақиятни такрорлай олмади.
1968 йилда Борис тадбирларнинг бирида “Чапаев” фильмида Петька ролини ўйнаган машҳур Леонид Кмитнинг қизи билан танишади. Инна актёрдан 13 ёш катта эди, лекин ёшдаги фарқ уларнинг муҳаббатига тўсқинлик қилмаган.
Ўша пайтларда у олис тоғли ҳудудда “Эски масжиддаги учрашув” фильмининг суратга олиш жараёнида қатнашаётган эди. Актёр ҳар куни севгилисига мактуб йўллаш учун узоқ йўл босиб, атрофдаги энг яқин қишлоққа келган. Бу муҳаббат оила қуриш билан мустаҳкамланди.
Маълум бўлишича, Бистров оила қуришга Иннага қараганда яхшироқ тайёр бўлган. У зўр ошпаз эди ва уларнинг қизи Екатерина туғилганда, у ҳам ота, ҳам она бўлган. Чақалоқни чўмилтирган, овқатлантирган ва тикув машинасида тагликларни моҳирлик билан тиккан.
Инна бўлса, уй ишларини қилишни ёқтирмаган. У ўзининг телевидениедаги ишига шўнғиб кетган эди.
Машҳурликка ўрганиб қолган актёрга берилган унчалик ҳам кўзга кўринмайдиган роллар унга фақат қайғу келтиради. Ичкиликка берилади ва бу унинг ташқи кўринишига ҳам ёмон таъсир қилади. Қолаверса, оиласи ҳам дарз кета бошлаган эди.
Лекин Инна оиланинг бузилишига қарши эди, сабаби қизи бутун оилада катта бўлишини хоҳлади. Барибир Екатерина ўн ёшга тўлганида Борис Инна билан ажрашди ва яна ҳам кўпроқ ичкиликка ружу қўйди.
Театрда роллар деярли йўқ эди, фильмларга бўлса уни таклиф қилмай қўйишди. Молиявий аҳволини яхшилаш учун у дубляжга киришга қарор қилди. Ва бундан ҳеч афсусланмаса ҳам керак. Тез орада у дубляж учун туғилгани маълум бўлди.
У яна оила қуришга ҳаракат қилди ва раққоса Татьяна Лейбелга уйланди. Аммо турмуш узоқ давом этмади. Татьяна Канадага кетмоқчи бўлганида уларнинг йўллари айро тушди. Сабаби Бистров ўзнинг келгуси ҳаётини у ерда кўрмади. Аммо учинчи уриниш муваффақиятли бўлган десак адашмаётган бўламиз.
Актриса Ирина Савина биринчи учрашувданоқ унинг қалбидан жой олади. Борис уни ошпазлик истеъдоди билан ҳайратда қолдиришга қарор қилади. Гарчи Иринанинг ўзи зўр ошпаз бўлса-да, Бориснинг пазандалиги уни ҳайратда қолдирди. Улар бир-бирини ярим сўзидан тушунарди ва тез орада турмуш қуришди.
Актрисанинг биринчи турмушидан Борис исмли ўғли бор эди. Бир неча йил ўтгач, жуфтлик Николай исмли боланинг ота-онаси бўлди.
Аста-секин ҳаёт ўз изига туша бошлади. 90 йилларда, кўплаб актёрлар ишсиз қолганида Бистров дубляж билан муваффақиятли шуғулланган. Ирина эрига спиртли ичимликларга қарамликдан халос бўлишга ёрдам бериш учун кўп ҳаракат қилган ва бунинг уддасидан чиққан. Улар қирқ йилдан кўпроқ вақт давомида бирга яшаб келмоқда.
Бугунги кунда 78 ёшли Борис Евгеньевич сокин ҳаёт кечирмоқда. У рафиқаси билан бирга Москва драма театрида ишлаб келмоқда, фильм ва компьютер ўйинларига овоз беряпти. У ҳақиқий бахтни кечроқ бўлса-да топди, десак адашмаган бўламиз.
Изоҳ (0)