2024 йилги қироллик тўй мавсумини дунёдаги энг таниқли бўйдоқлардан бири бошлаб берди.
2023 йил октябрь ойида Бруней султони Ҳожи Ҳассанал Болкиаҳ ўғли шаҳзода Абдул Матиннинг Аниша Росна билан унаштирилганини маълум қилди. Султоннинг расмий баёнотида айтилишича, “қироллик буйруғи билан” тўй 2024 йил 7—16 январь кунлари саройда бўлиб ўтади (маросим 10 кун давом этади).
Султон Ҳассаналнинг ўнинчи фарзанди ва тўртинчи ўғли бўлган шаҳзода Матин кўп йиллардан буён оммавий тадбирларда — қирол Чарльзнинг тож кийиш маросимидан тортиб, 2023 йилнинг май ойида бўлиб ўтган Иордания шаҳзодаси Ҳусайн ва Ражва ал-Саиф тўйигача таниқли отасининг ёнида бўлиб, кўп йиллардан буён омма эътиборини ўзига тортмоқда.
Маълум қилинишича, 32 ёшли Абдул Матин анчадан бери Бруней султони маслаҳатчисининг набираси Аниша билан учрашиб юради. Жуфтлик бўлажак тўйларини 7 январда бошлашни режалаштирган бўлса-да, анъанавий ислом маросими 11 январда, тўй зиёфати ва Бруней пойтахтидаги парад 14 январь куни бўлиб ўтади.
Тўй олдидан Матин ижтимоий тармоқларда Аниша билан бирга тушган суратини жойлаб, “2024 йилда сизга энг яхши тилакларимни тилайман” деб изоҳ қолдирган.
Тўйда иштирок этадиган расмий меҳмонлар рўйхати ҳақида ҳозирча ҳеч нарса маълум эмас, аммо тантанали тадбирга бутун дунёдан қироллик оилалари аъзолари келиши кутилмоқда.
Бруней султонининг болалари ичида Абдул жониворларга ва экстремал спортга бўлган муҳаббати билан ажралиб турарди. Шаҳзода ўзининг шахсий мулки бўлган йўлбарс ва леопардларнинг суратларини вақти-вақти билан оммага кўрсатиб туради. Абдул йиртқичларга оддий уй ҳайвонларидек муносабатда бўлиб, уларга ётоғида, худди мушук каби эгаси билан ухлашларига имкон беради. Бундан ташқари, Матин узоқ вақтдан бери экстремал спортга иштиёқманд — у океан тубига шўнғишни ёки йўлтанламасда чўлларни сайр қилишни яхши кўради.
Изоҳ (0)