Японияда 1 январь куни юз берган кучли зилзила оқибатида 84 киши ҳалок бўлди. Бу ҳақда маҳаллий расмийларга таяниб, NHK хабар берди.
7,6 магнитудали зилзила Исикава префектурасининг Важима шаҳрида кенг кўламли вайронагарчилик ва ёнғинларга сабаб бўлди, давомли силкинишлар 72 соатдан буён давом этаётган қутқарув ишларига тўсқинлик қилди. Исикава префектурасида етти қаватли бино қулаб тушган, марказий ҳудудда кучли ёнғин содир бўлиб, 200 дан ортиқ биноларни қамраб олган.
Зилзила туфайли Ниигата, Тояма, Фукуи ва Гифу префектураларида ҳам вайронагарчиликлар қайд этилган. Камида 305 нафар префектура аҳолиси жиддий жароҳат олган. Исикава префектурасидаги камида 261 та уйга зарар етган, 51 киши бердарак йўқолган. Табиий офатдан жами 339 киши жабр кўргани тахмин қилинмоқда.
Қидирув-қутқарув операцияси давом этмоқда, унга фавқулодда хизматлар, полиция ва мудофаа кучлари аскарлари жалб этилган.
Изоҳ (0)