Meta Platforms бош директори Марк Цукерберг 2023 йилнинг тўртинчи чорагида компания акцияларини тахминан 428 миллион долларга сотди.
Бу ҳақда Bloomberg агентлиги хабар берди.
Қайд этилишича, бу унинг икки йилдаги илк акциялари савдоси бўлиб, Цукерберг компания акциялари нархи сўнгги етти йилдаги энг паст даражага тушиши фонида бундай қарорга келган. Бозор регулятори ҳисоботига кўра, Цукерберг 1 ноябрдан йил охиригача ҳар бир савдо кунида акцияларни сотган ва деярли 1,28 миллион дона акцияни пуллаган.
Meta раҳбари ўртача ҳар бир савдодан 10,4 миллион доллар даромад олди, энг катта даромадни 28 декабрда қўлга киритди. Шу куни у акциялар сотувидан 17,1 миллион долларга эга бўлди.
“Бундан олдин Цукерберг 2021 йил ноябридан бери Meta акцияларини сотмаган эди. Ўтган йили компания акциялари нархи 2022 йил охиридаги етти йиллик энг паст кўрсаткичдан кейин 194 фоизга кўтарилди”, — дейилади ҳисоботда.
Бундан ташқари, Meta акциялари 2023 йилда Nvidia Corp’дан ташқари бошқа барча йирик технология гигантларидан устун келди ва ҳозирда 2021 йил сентябрь ойидаги рекорд даражага яқинлашмоқда.
Умуман олганда, Цукерберг Меtа компаниясининг 13 фоизига эгалик қилади. Bloomberg Billionaires Index маълумотларига кўра, у тахминан 125 миллиард долларга эга бўлиб, бу уни дунёдаги еттинчи энг бой одамга айлантиради.
Изоҳ (0)