Ўзбекистонда 2024 йил 1 апрелдан газланган ёки энергетик ичимликларга акциз солиғи жорий этилади.
Бу ҳақда “Солиқ ва бюджет сиёсатининг 2024 йилга мўлжалланган асосий йўналишлари қабул қилингани муносабати билан Ўзбекистон Республикасининг айрим қонун ҳужжатларига ўзгартириш ва қўшимчалар киритиш тўғрисида”ги қонунда белгиланди.
Ҳужжатга кўра, таркибида шакар ёки бошқа ширинлаштирувчи ёки хушбўйлаштирувчи моддалар бўлган, газланган ҳамда истеъмол қадоғига қадоқланган ичимликларнинг (энергетик ва тетиклаштирувчи ичимликлар бундан мустасно) 1 литри учун 500 сўм, энергетик ва тетиклаштирувчи ичимликларнинг 1 литри учун 2 000 сўм миқдорида акциз солиғи белгиланади.
2023 йилнинг ноябрь ойида ҳукуматнинг таркибида шакар бўлган ичимликлар учун акциз солиғини жорий этиш режалари жуда кўпчилик тадбиркорларнинг ҳайратига сабаб бўлганди. Ўзбекистон Алкоголсиз ичимликлар ва шарбат ишлаб чиқарувчилар уюшмаси ижрочи директори, халқаро муносабатлар ва Европа тадқиқотлари фанлари магистри Алфия Мусина бу ҳолат қандай оқибатларга олиб келиши мумкинлиги ҳақида сўзлаб берганди.
Декабрь ойида бўлиб ўтган Сенат япли мажлисида бош вазир ўринбосари, иқтисодиёт ва молия вазири Жамшид Қўчқоров бундай ичимликлар учун солиқ солиниши соғлом турмуш тарзи ва табиатни асрашни тарғиб қилиш мақсадида жорий этилишини айтганди.
Изоҳ (0)