2023-yilda ko‘plab sanʼat vakillari farzandlarining to‘yini o‘tkazib, qaynotalik maqomiga erishdi. Mashhurlar ishtirokidagi to‘ylar ijtimoiy tarmoqlarda ko‘plab muhokamalarga sabab bo‘ldi.
Ulug‘bek Xolmedov ikkinchi marta uylandi
O‘zbekistonda xizmat ko‘rsatgan artist Mirzabek Xolmedov kenja o‘g‘li Ulug‘bek Xolmedovni uylantirdi. Ammo bu birinchi nikoh emas, aktyor bundan avval ham oila qurgandi. Uning ilk nikoh to‘yi 2020-yilning 14-iyun kuni bo‘lib o‘tgan. Karantin kuchaytirilgan payt bo‘lgani uchun Mirzabek Xolmedov to‘yni hovlisida o‘tkazgan. Afsuski, kelin-kuyovlarning munosabati uzoqqa bormay, uzilgan. 2023-yilning 2-iyul kuni Ulug‘bek yana oila qurdi. Uning navbatdagi to‘yi ham dabdabali tarzda o‘tkazildi va unda o‘zbek sanʼatining ko‘plab vakillari ishtirok etdi.
Fathulla Maʼsudovning kenja o‘g‘li oila qurdi
Marhum ijodkor, O‘zbekistonda xizmat ko‘rsatgan artist Fathulla Maʼsudovning o‘g‘li Abdulloh Maʼsudov ham bu yil bo‘ydoqlar safini tark etdi. Uning to‘yi poytaxtdagi muhtasham restoranlardan birida bo‘lib o‘tdi. Yosh aktyor Abdulloh Maʼsudov namanganlik qiz bilan oila qurdi. Yoshlarni tabriklash uchun teatr va kino aktyorlaridan tashqari, Yulduz Usmonova, Mavluda Asalxo‘jayeva, Botir Qodirov ham tashrif buyurdi. Kuyovning Yorqinxo‘ja Umarov bilan kuylagan dueti esa kutilmagan yangilik bo‘ldi.
Sohib Abbosxon qizini uzatdi
Uzoq yillardan buyon AQSHda ishlayotgan mahoratli rejissor Sohib Abbosxon ham bu yil to‘y qildi. U qizini turmushga berdi. Yodingizda bo‘lsa, ikki yil avval ham u qizlaridan birini turmushga bergan, ammo to‘yda o‘zi ishtirok etolmagandi. Navbatdagi to‘yda esa o‘zi bosh-qosh bo‘ldi, shu bilan birga o‘zbek sanʼatkorlarini bir dasturxon atrofiga to‘pladi.
Vazirning qiziga uylangan Yorqinxo‘ja Umarov
2023-yilning eng shov-shuvli to‘ylaridan biri shubhasiz Ozodbek Nazarbekovning qizi Zinnurani uzatgani bo‘ldi. Mashhur ijodkor qizini xonanda Yorqinxo‘ja Umarovga turmushga berdi. Ularning nikoh oqshomi 19-sentyabr kuni bo‘lib o‘tdi. To‘y haqiqiy shouga aylandi. Bu to‘yda qaysi mashhur sanʼatkor keldi, degandan ko‘ra kelmaganlarini tilga olish osonroq. Boisi, mehmonlar orasida sanʼat va madaniyat vakillari nihoyatda ko‘p edi. To‘y bilan bog‘liq xabarlar shou-shuvga aylandi, undan keyin Zohida Umarovaning intervyusi esa gap-so‘zlarning yanada avj olishiga sabab bo‘ldi. Chunki u 31 yoshli o‘g‘li, Madaniyat vazirining 17 yashar qizi bilan qanday tanishgani va qaynotasini qanday ko‘ndirgani haqida intervyu berdi.
Suyunbek ham qudali bo‘ldi
Suyunbek roli bilan tomoshabinlarga yaxshi tanish bo‘lgan aktyor Rixsitilla Abdullayev ham bu yil quda bo‘ldi. U 20 yoshli o‘g‘li Tojirahmonni uylantirdi. Maʼlumotlarga ko‘ra, kelin o‘g‘lining parallel sinfdoshi bo‘lgan va ular besh yil avval bir-biriga ko‘ngil qo‘ygan. Asosan zodagonlar to‘yida boshlovchilik qiladigan Rixsitilla Abdullayevning to‘yi ham o‘ziga xos, oliy darajada o‘tdi.
Komik aktyor qizini turmushga berdi
Komik rollari bilan tomoshabinlarga yaxshi tanish bo‘lgan aktyor Muzaffar Nuriddinov ham yakunlangan yilda qizini turmushga berdi.
Muzaffar Abduazimov esa o‘g‘lini uylantirdi
“Onam kasalman, demang” qo‘shig‘i bilan xalq mehrini qozongan xonanda Muzaffar Abduazimov ham 2023-yilda o‘g‘lini uylantirdi. Nikoh to‘yi poytaxtdagi eng muhtasham restoranlardan birida bo‘lib o‘tdi. Yoshlarni tabriklash uchun o‘zbek sanʼatining ko‘plab vakillari tashrif buyurdi.
Izoh (0)