Рақамли технологиялар вазири Шерзод Шерматов ҳамда Тошкент шаҳар ҳокими вазифасини бажарувчи Шавкат Умрзоқов East Games МЧЖ директори Анатолий Сой билан учрашув ўтказди. Бу ҳақда Рақамли технологиялар вазирлиги матбуот хизмати хабар берди.
Қайд этилишича, учрашувда 20 декабрь куни давлат раҳбарининг IT соҳасини ривожлантириш ва давлат бошқарувини рақамлаштириш юзасидан видеоселектор йиғилиши давомида белгилаб берган устувор вазифалари ҳамда келгусида IT корхоналар учун тақдим этиладиган имтиёзлар бўйича маълумотлар берилган.
Ўз навбатида, хорижий корхоналарни Ўзбекистонга жалб қилиш, ёшларнинг малакасини ошириш, IT хизматлар экспортини янада ривожлантириш бўйича таклиф ва мулоҳазалар тингланган.
Шунингдек, президент видеоселектор йиғилишида таъкидланганидек, 50 дан ортиқ IT мутахассисини ишли қилган компанияларнинг бир йил давомидаги иш ҳақи харажатининг 15 фоизгача қисми қоплаб берилиши, экспортчи корхоналарга четдан эксперт жалб қилиш, халқаро конференцияларда қатнашиш харажатларининг 50 фоизи компенсация қилиниши айтиб ўтилган.
Шу билан бирга, Ўзбекистонда ўйинлар яратиш ва ўйин саноатини ривожлантириш соҳасидаги ҳамкорлик истиқболлари муҳокама қилинган.
Аввалроқ Жанубий Корея компанияси Ўзбекистонда IT таълимни ривожлантириш мақсадида Smart class хоналарини ташкил этиш таклифини билдираётгани тўғрисида хабар берилганди.
Изоҳ (0)