Raqamli texnologiyalar vaziri Sherzod Shermatov hamda Toshkent shahar hokimi vazifasini bajaruvchi Shavkat Umrzoqov East Games MCHJ direktori Anatoliy Soy bilan uchrashuv o‘tkazdi. Bu haqda Raqamli texnologiyalar vazirligi matbuot xizmati xabar berdi.
Qayd etilishicha, uchrashuvda 20-dekabr kuni davlat rahbarining IT sohasini rivojlantirish va davlat boshqaruvini raqamlashtirish yuzasidan videoselektor yig‘ilishi davomida belgilab bergan ustuvor vazifalari hamda kelgusida IT korxonalar uchun taqdim etiladigan imtiyozlar bo‘yicha ma’lumotlar berilgan.
O‘z navbatida, xorijiy korxonalarni O‘zbekistonga jalb qilish, yoshlarning malakasini oshirish, IT xizmatlar eksportini yanada rivojlantirish bo‘yicha taklif va mulohazalar tinglangan.
Shuningdek, prezident videoselektor yig‘ilishida ta’kidlanganidek, 50 dan ortiq IT mutaxassisini ishli qilgan kompaniyalarning bir yil davomidagi ish haqi xarajatining 15 foizgacha qismi qoplab berilishi, eksportchi korxonalarga chetdan ekspert jalb qilish, xalqaro konferensiyalarda qatnashish xarajatlarining 50 foizi kompensatsiya qilinishi aytib o‘tilgan.
Shu bilan birga, O‘zbekistonda o‘yinlar yaratish va o‘yin sanoatini rivojlantirish sohasidagi hamkorlik istiqbollari muhokama qilingan.
Avvalroq Janubiy Koreya kompaniyasi O‘zbekistonda IT taʼlimni rivojlantirish maqsadida Smart class xonalarini tashkil etish taklifini bildirayotgani to‘g‘risida xabar berilgandi.
Izoh (0)