Нью-Йоркда минглаб Фаластин тарафдорлари уруш тўхтатилишини талаб қилиб намойиш ўтказди

Нью-Йоркда Фаластин тарафдори бўлган жамоат фаолларининг икки гуруҳи Манхэттен кўчаларини тўлдирди, деб хабар бермоқда New York Post.

АҚШда Фаластин-Исроил можаросининг янги босқичидан сўнг кенг кўламли намойишлар бўлиб ўтмоқда, уларнинг мутлақ кўпчилиги Ғазо секторида ўт очишни тўхтатишни талаб қилмоқда. Нашр аввалроқ Рождество кунида Фаластин тарафдори бўлган юзлаб фаоллар Манхэттендаги Рокфеллер маркази атрофидаги кўчаларни тўлдиргани ҳақида хабар берган эди.

New York Post газетасига кўра, 28 декабрь, пайшанба куни Нью-Йоркда бир вақтнинг ўзида иккита намойиш бўлиб ўтди. Мингга яқин киши Қуйи Манхэттен кўчалари бўйлаб “Дарёдан денгизгача бўлган ҳудудда Фаластин озод бўлади” шиорини айтиб, юриш ўтказди.

Улар Oculus Center савдо марказининг асосий кириш эшигини тўсиб қўйди. Полиция ташриф буюрувчиларни акция ўтказиладиган жойдан узоқроқда жойлашган бошқа чиқиш эшикларига йўналтирган. Намойишчилар BNY Mellon банки штаб-квартирасида ҳам тўхтаб, “геноцидни молиялаштираётгани” учун банкка эътироз билдиришган.

Акция Foley майдонида оммавий ибодат қилиш билан якунланган. New York Post ҳуқуқ-тартибот идораларига таяниб, акция давомида ҳибсга олинганлар бўлмаганини ёзмоқда.