АҚШ собиқ президенти Дональд Трампга Мэн штатида бўлиб ўтадиган Республикачилар партияси праймеризида президентликка номзодини қўйиш тақиқланди. Мэн штати давлат котиби Шанна Беллоуз томонидан қабул қилинган ушбу қарор 29 декабрь куни штат давлат котиби департаментининг расмий сайтида эълон қилинди.
Қарор АҚШ конституциясига исёнда қатнашган шахсларнинг фуқаролик ёки ҳарбий давлат лавозимларини эгаллашини тақиқловчи 14-тузатишига асосланган. Трамп ўз тарафдорларининг 2021 йил январида Капитолийга бостириб киришига сабаб бўлган ҳаракатларни қўзғатганликда айбланмоқда.
“Жаноб Трамп зўравонлик эҳтимолини тушунган ва бошида уни қўллаб-қувватлаган, чунки уни тўхтатиш учун ўз вақтида чора кўрмади”, — деб тушунтирди Мэн штати давлат котиби.
Унинг сўзларига кўра, Трампнинг “акция қатнашчиларини тинчликка чақиргани” унинг “демократик сайловларни тўхтатиш бўйича бир неча ойлик ҳаракатлари”ни оқламайди.
Дональд Трамп сайловолди штаби матбуот котиби Стивен Чжан АҚШ собиқ президенти тарафдорлари Беллоузнинг қарорига судда эътироз билдиришини айтган. Аввалроқ Трамп Беллоуздан унинг праймеризларини кўриб чиқишда қатнашмасликни талаб қилганди, чунки у Демократик партиядан собиқ штат сенатори бўлган ва 2021 йил 6 январдаги воқеаларни очиқчасига исён деб атаган, бу эса, Трампнинг фикрича, уни нохолис позицияни эгаллашга ундайди.
Мэн Трампга сайловда иштирок этишига рухсат бермаган иккинчи штатга айланди
19 декабрь куни Колорадо Олий суди Дональд Трампга штатда Республикачилар партиясидан бўлиб ўтадиган праймериз сайловида президентликка номзодини қўйишни тақиқлаганди. Судьяларнинг қарори, худди Мэндаги каби, АҚШ Конституциясига киритилган 14-тузатишга асосланган.
Трампга қарши худди шундай даъволар яна бир қанча штатларда ҳам очилган. Ноябрь ойида Миннесота Олий суди собиқ президентнинг сайловда қатнашишини тақиқлашдан бош тортди, Мичиган штатида эса суд Оқ уй собиқ раҳбари сайлов бюллетенида қолиш-қолмаслигини суд тизими эмас, Конгресс ҳал қилиши керак, деган қарорга келди.
АҚШ собиқ президенти Капитолийга бостириб киришга алоқадорлигини рад этяпти.
Трамп суд ишларига қарамай номзодини қўймоқчи
Дональд Трампга қарши аллақачон тўртта жиноий иш очилган. Унга барча ишлар бўйича жами 91 та айблов қўйилган, у ўз айбини тан олмаяпти. Гап Жоржиядаги сайловлардаги қонунбузарликлар, махфий ҳужжатлар билан ноқонуний ишлаш, сайловда сохталаштиришга уриниш ва президентлик кампанияси учун йиғилган маблағларнинг ноқонуний сарфланиши ҳақида бормоқда.
Бундан ташқари, АҚШ собиқ президенти қатор суд жараёнларида иштирок этмоқда, улардан бири - кредитлар бўйича имтиёзли шартларни олишдаги фирибгарлик. Бироқ ҳатто Трампнинг ушбу ҳолатлар бирортаси бўйича айбдор деб топилиши ҳам уни номзодлик ҳуқуқидан маҳрум қилмайди. Шу билан бирга, у Республикачилар партиясидан сайловда иштирок этиши мумкин бўлган номзодлар орасида фаворит бўлиб қолмоқда, айни пайтда амалдаги президент Жо Байденнинг рейтинги сўнгги ойларда Исроил — ҲАМАС уруши фонида пасайиб бормоқда.
Изоҳ (0)