O‘zbekistonda 12-dekabrdan gaz zapravkalarning ish vaqtiga o‘zgartirishlar kiritilib, soat 06:00 dan 12:00 gacha etib belgilandi. Bu haqda “Hududgazta’minot” matbuot xizmati xabar berdi.
Ma’lum qilinishicha, 11-dekabr kuni gaz taʼminoti tashkilotlari tomonidan aholi va ulgurji isteʼmolchilarga 105,8 million kub metr tabiiy gaz yetkazib berildi. Bundan tashqari suyultirilgan gaz isteʼmolchilariga 2543 tonna yoqilg‘i yetkazilgan.
“Muammolar kuzatilgan joylarda gaz taʼminotini yaxshilash borasida soha mutaxassislari tomonidan barcha kerakli ishlar davom ettirilmoqda. Jumladan, avariya-tiklash jarayonlari tezkorlik bilan olib borilmoqda”, — deyiladi xabarda.
Bundan tashqari, ayrim joylarda isteʼmol ortgani sababli gaz bosimi pasayishi kuzatilmoqda. Shuning uchun bugundan AGTKSHlar ish vaqtiga o‘zgartirishlar kiritilib, soat 06:00 dan 12:00 gacha etib belgilandi. Ushbu choralar vaqtinchalik bo‘lib, havo harorati keskin pasayib ketgan vaqtda qo‘llaniladi.
Noqulay ob-havo sharoitlariga qaramay isteʼmolchilarning gaz taʼminotini yaxshilash ishlari davom ettirilmoqda. Mazkur davrda alohida mahalla va xonadonlarda gaz yetishmovchiligini oldini olish maqsadida, “Hududgaztaʼminot” AJ fuqarolardan gaz jihozlaridan faqat birlamchi zaruriyatlar uchun foydalanishni, uydan chiqib ketayotganda imkon qadar isitish jihozlarini o‘chirishni so‘raydi.
Bundan avval Andijon, Surxondaryo viloyatlari va Qoraqalpog‘istondagi metan zapravkalar faoliyatiga cheklov o‘rnatilgandi. Birinchi navbatda aholi, shifoxona, maktab hamda maktabgacha ta’lim tashkiloti kabi ahamiyatga ega muassasalarning tabiiy gaz ta’minoti barqarorligini ta’minlash maqsad qilingan.
“Daryo” jurnalistining kuzatuvlariga ko‘ra, Toshkentdagi metan zapravkalarda ham turnaqator navbatlar yuzaga kelgan bo‘lib, tadbirkorlarga kunning ma’lum qismida ishlashga ruxsat berilgan. Aksariyat zapravkalar soat 15:00 dan keyin, ayrimlari 17:00 dan keyin faoliyat yuritmayapti. Biroq hozircha mas’ullar bu holatni izohlamagan.