Лондон мэри Содиқ Хон шаҳарнинг “Улез” дастури доирасида утилизация қилинадиган машиналарни Украинага жўнатиш режасини блоклади. Бу ҳақда The Telegraph ёзмоқда.
Сентябрь ойида Киев мэри Виталий Кличко автомобилларнинг бир қисмини Украинага беришни сўраганди. Унинг сўзларига кўра, бу ёрдам “катта потенциал” берар эди, транспорт воситаларидан эса “турли хил қутқарув ва транспорт функцияларида” фойдаланиш мумкин эди.
Хон декабрь бошида Кличкога жавоб хати ёзган. У Киев мэрига сўровни рад этиб, бундай етказиб бериш қонунга зид бўлишини, чунки “Улез” дастури лондонликлар учун “иқтисодий, ижтимоий ва экологик нуқтаи назардан” фойда келтириши кераклигини айтди.
Маълумот учун, “Улез” дастури Лондоннинг углерод чиқиндиларини камайтиришга қаратилган чора. Унинг доирасида шаҳар аҳолиси маълум экологик талабларга жавоб бермайдиган автомобилларни – асосан йўлтанламас ва пикапларни ўз ихтиёри билан утилизацияга топширса, 2000 фунт стерлинг олиши мумкин. Акс ҳолда улар кунига 12,50 фунт стерлинг тўлаши керак бўлади.
Хоннинг қарори мухолифатдаги Консерватив партия ва Украинага ёрдам беришда иштирок этган кўнгилли ташкилотлар томонидан аллақачон танқид қилинган.
Лондон мэри учун май ойида бўлиб ўтадиган сайловга консерватив номзод Сюзан Ҳолл сўровни рад этишни “бемаънилик” деб атади ҳамда Украинага ёрдам “барча лондонликлар ва жаҳон ҳамжамиятининг манфаатларига мос келишини” таъкидлади. Ҳоллга яқин манбаларнинг айтишича, агар у сайланса, Украинага машиналарни бериш учун қонунни ўзгартирмоқчи.
Изоҳ (0)