Европада Хавфсизлик ва Ҳамкорлик Ташкилоти (ЙХҲТ) Европа Иттифоқининг молиявий кўмагида “Тожикистоннинг Афғонистон билан жанубий чегарасини барқарорлаштириш” лойиҳаси доирасида Тожикистон Чегара қўшинларининг 84 нафар зобитини ўқитди. Бу ҳақда ташкилотнинг Душанбедаги дастурий офисига таяниб, “ТАСС” хабар бермоқда.
“Тожикистон Республикаси Чегара қўшинларининг 84 нафар офицери Европа Иттифоқи томонидан молиялаштирилган ўқув курсларида билим ва малакаларини оширди”, — дейилади хабарда.
Жумладан, Сўғд вилоятидаги ихтисослаштирилган чегара отряди 31 нафар офицери ўзини ўзи мудофаа кўникмалари, омон қолиш усуллари, дала шароитида қўлбола воситалардан фойдаланган ҳолда биринчи тиббий ёрдам кўрсатиш, радиоалоқа ва топография бўйича сабоқ олган. Яна 22 нафар офицер Хўжанд шаҳрида тезкор режалаштириш, брифинг техникаси ва хавфларни бошқариш бўйича, 31 нафар офицер, жумладан, тўрт нафар аёл чегарачи госпиталида дала тиббиёти ва ярадорларни ташиш бўйича ўқитилган.
ЙХҲТ офиси хабарида қайд этилишича, лойиҳа чегара қўшинлари ҳамда Тожикистон Фавқулодда вазиятлар ва фуқаролик мудофааси қўмитасининг чегарадош ҳудудлардаги ноқонуний хатти-ҳаракатларга қарши курашиш ва табиий офатларга жавоб бериш бўйича профессионал салоҳиятини оширишга қаратилган.
Октябрь ойида Европа Иттифоқи томонидан молиялаштирилган ЙХҲТ лойиҳаси доирасида Тожикистон Чегара қўшинларига транспорт воситалари ва техник жиҳозлар топширилганди. Жумладан, учта Toyota Hilux 4X4 тез тиббий ёрдам машинаси ва хариталарни чоп этиш учун иккита плоттер берилган. Тоғли ҳудудларда ишлаш учун махсус мослаштирилган тез тиббий ёрдам машиналари фавқулодда вазиятларда биринчи тиббий ёрдам кўрсатиш учун тўлиқ тиббий асбоб-ускуналар билан жиҳозланган. Плоттерлардан Афғонистон билан 1 350 километрлик чегарада хизмат қилаётган тожик чегарачиларининг дала операцияларида фойдаланилади.
Изоҳ (0)