Тожикистон Миллий хавфсизлик давлат қўмитаси (МХДҚ) ходимлари Афғонистондан йирик партиядаги қурол-яроғ олиб ўтган уч нафар террорчини йўқ қилди, деб хабар бермоқда маҳаллий “Ховар” ахборот агентлиги.
Гап “Жамоат Ансорулло” гуруҳи аъзолари ҳақида кетмоқда. Гуруҳга ўн йилдан кўпроқ вақт олдин мухолифатчи жангарилар собиқ қўмондони, асли тожикистонлик шахс асос солган. Гуруҳ “Толибон” билан ҳамкорлик қилишда гумонланади.
“Ховар” хабарига кўра, 30 августга ўтар кечаси гуруҳнинг уч нафар аъзоси Кеврон қишлоғи (Тожикистоннинг Тоғли Бадахшон мухтор вилояти) яқинида тожик-афғон чегараси чизиғини ноқонуний кесиб ўтган. Шундан сўнг воқеа жойига МХДҚ ходимлари етиб келган, улар 5 сентябрь куни эрталаб террорчиларни ўраб олиб, таслим бўлишни таклиф қилган, бунга жавобан террорчилар ўт очган.
“Аксилтеррор операцияси натижасида террорчилик гуруҳининг уч нафар аъзоси йўқ қилинди”, — дейилади хабарда.
Террорчилар ўзларидаги қуроллардан ташқари қўшни давлатдан катта партияда қурол-яроғ, ҳарбий ўқ-дорилар ва портловчи моддаларни олиб келиб, омборхоналарга жойлаштирган.
“Ховар” қайд этишича, илгари ушбу гуруҳ аъзоларига нисбатан жиноят иши қўзғатилган. Уларнинг барчаси қидирувга берилган.
26 апрелда ҳам “Жамоат Ансорулло”нинг икки аъзоси Тожикистон ва Афғонистон ўртасидаги чегарани ноқонуний кесиб ўтганди. Аксилтеррор операцияси натижасида улар зарарсизлантирилган.
Изоҳ (0)